MNF sawrkar thlak duhna mipuiin an nei lo – Tawnluia

MNF sawrkar chu mipuiin an dem loa, sawrkar lai thlak duh na lian tak a awm lo nia a hriat thu MNF senior vice president Tawnluia chuan a sawi.
Thawhtannia MNF office Mizo Hnam Run inkhawmah Tawnluia chuan tupawh lo sawrkar se, an thiltih leh an hnathawhah teh thin nise, sawrkar kaltawhte engmah ti lo ang maia sawi thin chu a tha lo, tiin, “Political party-ten manifesto kan duan hi inteh nan hmang ila a duhawm hle ang,” a ti.
MNF sawrkar chu mipuiin an dem loa a hriat thu a sawi a. Hrileng, raltlan leh harsatna hrang hrang kara sawrkar hmalakna chu a tha thawkhat a. Lalpa hming lam theia an awm chu a lawmawm takzet tiin a sawi. Tun ministry-a chief minister Pu Zoramthanga kaihhruainaah mipuiah sawrkar lai thlak duhna ‘anti-incumbency’ lian tak a awm lo tih sawiin, lawmawm a tih thu leh Mizo nationalism kengnungtute chu mipuiin an kutah sawrkarna an dah leh ngei dawn thu a sawi a ni.
Result chhiar hunah pawh lawm thiam tura inbuatsaih turin MNF senior vice president hian an party mite a chah a. “Kan hmabak vote chhiar hunah chak thei kan ni a; chak lo thei kan ni. Khawvela kan awm chhungin dam lohna leh harsatna a awm thin. Hlim leh lawm chang a awm angin, engpawh hmachhawn thiam turin inbuatsaih ang u. Chu chu mipuitling tihdan a ni. Hnehna kan chang a nih pawhin chapona leh midangte deuna a awm thei. Kan party chu puitling takin awm ang u,” a ti. State sawrkar siam turin MNF party chuan majority a neih ngei a ring tih a sawi bawk.
Tluang taka MLA inthlan nei tura state election hotute leh sawrkar official-te, political party te, TV leh print media leh MPF-te thawhhonaah deputy chief minister Tawnluia hian lawmthu a sawi a. Mizoram mipui zaa 80-in vote an thlak chu lawmawm a tih thu a sawi. ECI-in vote chhiar huna Pathianni a ruat chungchangah party leh sawrkar ang chuan an duh lo hle a, hma an la zel tih a sawi a ni.