Zirlai pawlin scho’ an nawr Inthlan phuarna vang – MSB

A dawng tur zirlaite hnena tribal scholarship la sem zawh loh chu sem zawh thuai a nih theih nan Mizo Zirlai Pawl chuan Mizoram Scholarship Board (MSB) ah na zawka nawr an tum mek a, MSB lam hian MLA inthlan puan a nih tak thut avanga sem mai theih loh a ni a, semchhuah turin engkim tihfel a ni tawh tih an sawi ve thung.
MZP Gen. Hqrs. chuan Thawhtanni khan zirlaiten tribal scholarship 2nd installment la dawnglo ten an dawn thuai theih nan Mizoram sawrkarah vawi tam an lo thlen tawh a, scholarship file pawh umzui a ni a. Tun thlenga scholarship an la dawn loh avangin vawiin – November 14 zing dar 9 hian Mizoram Scholarship Board office Dawrpui Vengthar kawtah sit-in demonstration neih a rel thu a tichhuak a. Hei hian awmzia a neih loh chuan zirlaiten an chanpual scholarship an dawn thuai theih nan hma lak zel a tum tih a sawi.
‘Zirlaite scholarship second installment tang hi cheng nuai 1787.48 a ni a, heng sum hi Mizoram sawrkar kuta a luhna a rei tawh hle a. Zirlaite hnena pe chhuak thuai turin thuneitute kan ngen nawn a ni,’ a ti.
MZP sawi danin, scholarship 2nd installment la dawnglo hi zirlai 19495 an awm a. Mizoram chhunga zirna in 36 atangin zirlai 5023 bakah pawl XI leh XII zirlai 11462 leh, Mizoram pawna awm zirlai 3010 an ni.
Hetihlai hian MSB hotute chuan scholarship ami tur sum hi sawrkar chuan a dawng tawh ngei a, inthlan puan avanga code of conduct hnuaia awm tak hnu ah bawhzui hleihtheih lohin a awm zui ta tih an sawi. Scholarship tur hi Thawhtanni (November 13) khan chief secretary hoin a kaihhnawih department hotuten an sawiho a, election code of conduct phuarna hnuaiah Mizoram ala awm avangin Election Commission pawmpui turin thawn leh a ni anga, an pawmpuina hmuh veleh semchhuah theih mai turin an inpeih tih an sawi a ni.