Traffic light hmang chhin Mipuiin a ngaihna hre lo

Aizawl Smart City Ltd hmalakna hnuaia Aizawla traffic signal light hman chhin chu November 13 khan kalpui tan a ni a. Mipui nawlpuiin traffic light kaihhnawih an hre vak lo nia hriat a ni.
Lirthei chetvel dan thununna – Adaptive Traffic Control System (ATCS) ah hian traffic signal light rawng – sen, eng leh hring hmanga lirthei tlan dan khuahkhirh leh enkawlna tur hi ruahman a ni a. Bazar Bungkawn leh Bawngkawn Sairang pengah tih chhin a ni.
Traffic Police-te ruahmanna in chawhma dar 11.00 atanga chawhnu dar 3.00 thleng enchhin a ni a, Bazar Bungkawnah hian chawhnu dar 1.30 vel thleng enchhin niin, Bawngkawnah erawh traffic jam a nasat avangin tih tan atanga darkar khat vel hnu ah tihtawp zui nia sawi a ni.
The Aizawl Post-in a zawhchiannaah traffic police duty-te chuan ATCS hi lirthei khalhtu mai ni lo, mipui tan thil thar a ni a, anmahni ngei tan pawh hman thar thil a nih avangin an la bel tawk lo tlang a, zawi zawiin kan thiam chhoh mai an ring tih an sawi.
Traffic signal light hi rawng chi thum a ni a. Rawng sen (red) a nih chuan lirthei tlan laite din tur a ni a, kawngpui vangtan zawnga rawng vara inrin ‘stop’ tih inziahna hmaa din tur niin, kea kal tan kawng a kan theih. Rawng eng (yellow) a lan chuan din inpeih tura hriattirna a ni a, din thut tur tihna niloin, tlanmuanga ding zui tura tihna a ni. Rawng hring (green) a lan chuan lirthei tan tlan zui zel a rem tawh tihna a ni.