Israel president-in damdawi in kan bei lo ti

Israel Preisent Isaac Herzog chuan Israel chuan Gaza a damdawi in lian ber chu a bei lo tiin a sawi.
Hetih lai hian Al-Shifa damdawi inah chuan electricity a awm tawh lo niin staff ten an sawi a, damdawi inah hian Palestinian sang chuang an awm mek bawk.
Mahse Herzog thung chuan damdawi inah engkim a pangngaiin a kal vek tiin a sawi a.
Chu mai bakah northern Gaza a Hamas fighter taksaah Adolf Hitler-a Mein Kampf lehkhabu hmuh a ni, a ti bawk a.
Herzog chuan Arabic tawnga leh Mein Kamf chu Hamas tena operation base atana an hman children’s room-ah pawh hmuh a ni tawh tiin a sawi bawk.
Nazi leader antisemitic manifesto hi kum 1925 khan chhut hmasak ber a ni a.
Northern Gaza-a Mein Kampf copy hmuh a nih avang hian Herzog chuan Hamas thenkhatte chuan ‘Adolf Hitler an Jews te a huatna ideology an zir tih a lang’ tiin a sawi bawk a.
Hetih lai hian World Health Organization (WHO) thung chuan Al-Shifa damdawi in nena inbiak pawhna an hloh tawh tiin a sawi thung a, damdawi ina damlote chu a chhehvela indona nasa taka vangin chhuak thei pawhin an awm chuang lo a ti bawk.
WHO chief Dr Tedros Ghebreyesus chuan a hnuah erawh an biak pawp leh theih thu sawiin mahse damdawi in chhunga dinhmun a chheh hle tiin a sawi a. Inkahhaina a awm ngiatin damdawi in chuan electricity leh tui ni thum chhung a nei tawh lo tiin a sawi bawk.
Gaza-a Hamas-run health minstry chuan fuel an neih loh avangin damlote zai emaw leh enkawlna tha an pek theih loh thu sawiin nausente tana incubators te pawh tihnun theihin a awm lo a ti bawk a. mahse, hei hi israel president chuan a hnial thung a.
“Heng hi kan hnawl vek a, Hamas tena an dawt sawi a ni. Shifa ah electricity a awm a, engkim a pangngaiin a kal vek,” tiin Herzog chuan a sawi a.
Israel chuan Hamas te hian hospital building hnuaiah tunnel an nei niin a sawi a, chu chu Hamas te chuan an hnawl ve thung.
Kar kalta Inrinni khan Surgeon Marwan Abu Saada chuan damdawi in chuan tui, eitur leh electricity a nei tawh lo tiin a lo sawi tawh bawk a.
France president Macron an inkahhai a rawt chungchangah Herzog chuan Israel chuan 7 October a beih a tawh hnuah mahni inveng him turin dikna a nei a nia ti a.
“Kan thawhpuite thu leh hla kan ngaithla a. Mahse, a pawimawh ber chu kan inven hmasak a ni,” tiin a sawi bawk a.
Gaza-ah civilian ten nunna an chan tih a phat loh thu sawiin mahse chung vanduaina tam takte chu Hamas te thlen zawk a ni a ti bawk.
Herzog chuan Gaza an beih dan chu ‘international humanitarian law rules angin’ an kalpui tia sawi bawkin an beih hma in civilians te chu phone call leh text messages hmangin northern Gaza atanga insasenga Gaza chhim lam pan turin an hriattir lawk vek tiin a sawi bawk a.
“Chhim lama an kal theih nan hun kan pe a ni,” tiin Herzog chuan a sawi bawk.
Indona chhuah hnu atangin Gaza ah hian nunna chan 11,000 chuang an awm tawh niin Hamas-run health ministry chuan a sawi a. Mihring maktaduai 1.5 velin an chenna an chhuahsan tawh niin United Nations’s agency for Palestinian refugees (Unrwa) chuan a sawi.
Israel hian 7 October a Hamas tena Israel mite beia Isreali 1,200 chuang an tihhlum hnuah a bei zui ve nghal a ni.
Indona chu hmar lam 41km huam chhung leh 10km vela zauah kalpui ber a ni a, chutihrual chuan chhim lama Rafah leh Khan Younis ah pawh bomb puak a awm reng bawk.

Israel che na zel
Israeli army te chuan thuchhuah an siamah Gaza Strip a operation an neih chu an la chhunzawm reng thu sawiin thlalak pawh tihchhuahna an nei a.
Israel sipaite chuan air strike tum 4300 an neih tawh thu sawiin chunga an tum ber chu leiverh tihchhiat leh Hamas command and control centre te a ni a ti bawk a. terrorist infrastructure site 3,000 chuang tihchhiat a ni tiin an sawi bawk.
Hetih lai hian EU chuan Gaza a inebeihna khaihlak tir lawka a awm theih nan inbiakna neih a tum thu sawiin Gaza-ah fuel te damdawi in tha taka kal theih nan pek luh a ngai a ti a.
Janez Lenarcic, European Commissioner for Crisis Management chuan Gaza Strip a damdawi inzah ve lawih te chu fuel an neih loh avangin an kal thei tawh lo tiin a sawi.
7 October atang khan Gaza-ah fuel chawkluh a ni tawh lo hrim hrim a. EU ram 27 te chuan Pathianni khan chhawmdawlna pek luh a nih theih nan inkahhaina an phut thu an sawi a. Chu mai bakah Hamas te chu medical facility leh civilian te inphen nana an hman avangin an dem thu an sawi bawk.
Kar kalta khan US leh Israel te chuan northern Gaza bikah nikhatah darkar li zel hun remchang an siam tur thu an sawi thung.