PRO lakah FIR thehlut

November 7-a MLA inthlanpui vote thlak ni a Aizawl South-III huamchhung Muallungthu Polling Station-a dan lo anga thil ti tu presiding officer (PRO) lakah Election Commission thu angin FIR thehluh a ni.
Election department hotute sawi danin, PRO Lalremmawi Colney laka FIR thehlut tur hian Election Commission chuan state Election department a hriattir a, November 13 khan Kulikawn Police Station-ah thehluh a ni. FIR thehluh a ngaih chhan presiding officer-in a hna – official duty a tih that loh avang leh document a phuahchawp (fabrication) vanga hremna lek tura kalpui na a ni tih an sawi.
Tarlan tawh thin angin, November 7-a vote thlak ni khan Muallungthu P/S ah hian EVM an hman chu inthlan hmaa vote an thlak chhin (mock poll) na chu paih (clear) loin mipui nawlpuiin vote an thlakna atan hman chhunzawm a ni a, he poling station-a vote nei aia tam vote a tla ta a ni.
He polling station-a duty zinga thuneitu ber – presiding officer hian thuneitu sang zawkte pun ta mai loin, voter awm zat hi a ziahbelh a, vote nei hming (signature) lem a ziah chu hriatchhuah a ni.
ECI hriattir a nih hnu ah he polling station bikah hian vote thlak a ni a, presiding officer hi a department awmna Agriculture department chuan a chawlhtir lailawk a, hei hi department-in a chhuichian dawn vang a ni. Commission thu ang bawk hian a lakah FIR hi thehluh a ni leh ta a ni.