TB vei thar 1900 chuang awm tawh
Kuminah October thleng khan Mizoramah TB (tuberculosis) vei hmuh thar 1929 an awm tawh a, June thleng khan he natna thihpui 62 an awm tawh.
State TB Cell chu kumin chhunga an hmalakna hrang hrang thlirhoin Nilaini khan Aizawlah an thukhawm a. Health & Family Welfare principal secretary Esther Lalruatkimi’n kaihruaiin, National Health Mission mission director Dr Eric Zomawia’n agenda sawifiahin, State TB officer Dr Febiola Kharkongor chuan powerpoint presentation hmangin agenda a sawizau a, hmalakna a sawi bawk.
TB tihrem kawnga hmalakna thlirlet niin, hmachhawp hrang hrang tihhlawhtlin a nih theih nan ruahmanna siam a ni a. School Education department, Social Welfare department bakah NGO hrang hrangte nen TB dona kawngah a tul anga thawkho turin ruahmanna siam a ni. Chief Informatic Office lamin TB chungchang data pawimawh an website-a an update zel theih dan tur rawtna siam a nih bakah damlote tan Falkawna District TB Centre chu a panna a hlat avangin mipui tana awlsam zawkna a nih theih nan Aizawla dah dan tur pawh sawi a ni a, he thil hi hmalak mek a nih thu inhrilh a ni.
Health principal secretary chuan TB tihrem kawngah theihtawpin hma lak ni mah se, chhan hrang hrang avangin TB vei hi kan tlahniam chak tawk lo hle a. Case pawhin pun lam a pan nia a lan avangin nasa zawka mipuiah zirtirna kan inpek nasat a pawimawh tih a sawi a. TB vei mekte dinhmun chu thuhran lo ni ta se, a la kai ve lo mipuiin a nawlpui ang pawha inven dan tur kan hriatchian lehzual a tul a ni, tiin, huamzau zawka awareness inpek a pawimawh tih a sawi.
State TB Cell report-a tarlan:
4Kumin 2023 January atanga October thlenga TB rinhlelh test zawng zawng mi 12309 an ni a. Ni nuai khat zelah mi 933 test ang a ni.
4Kumin January atanga October thlenga TB vei hmuhchhuah 1929 a ni a. Heng zingah hian MDR-TB vei 122 hmuh chhuah an ni. MDR-TB vei tihdam zat chu zaah 70 a ni.
4Kumin January atanga June thlenga TB vanga thi zat mi 62 an ni tawh a. TB tihdam zat chu damlo atanga chhutin zaa 83 a ni. TB leh HIV vei kawp zaah 12 an ni.
4Pradhan Mantri TB Mukt Bharat Abhiyaan hnuaia TB damlote chhawmdawlna kawngah doners 274 awm tawhin chaw tha pack (food basket) 2373 sem chhuah tawh a ni.