CYMA OB leh MJA member-te inkawm belh tlak ni turin intodelh a ngai: CYMA President

Nimin khan Central YMA Office bearer tharte leh MJA member-te chuan CYMA Committee room-ah inkawmhona hun tha tak an nei a; ram leh hnam tana thawhho dan tur inpawh tlang takin an sawiho.Inkawmhona kaihruaitu CYMA President Lalhmachhuana chuan, a tha zawnga ram leh hnam tana ke penho theih dan tur sawiho chu MJA member-te nena inkawmho an duh chhan a nih thu a sawi a. Mizoramah eng sawrkar pawh lo ding se, ram leh hnam thatna tura thawhpui an inhuam thu leh, sawrkar thawhpui thiam tura hmalak chu YMA thuthlungah pawh awm thu a sawi.
CYMA President chuan intodelh a pawimawh thu a sawi a. Ram chhung leh pawna Zofate belh tlaka Mizoram a awm a tul thu sawiin, “Intodelhna kawngah hian Mizo thalaite hi thawh hreh nei lova kan awm a ngai,” a ti a. “Min beltu turte tan belh tlak ni turin intodelh a pawimawh a ni,” a ti bawk.
Lalhmachhuana chuan ruihhlovin Mizoram a tihbuai tawh dan sawiin, tunhma chuan ruihhlo penicillin bur khat te, hawng khat te manchhuah a nihin kan lawm viau a, tunah chuan vawikhata ruihhlo manchhuah chu a Kg te, hawng 30/40 te a ni ta zel, a ti a. Ram danga kan unaute nena kan inlaichinna tha tak remchanga lo hmanga a ruka ruihhlo tawlhtute chu dim an ni dawn lo, a ti a. Ram danga Zofate pawh theihtawp chhuaha ruihhlo dopui turin a sawm nghal a ni.
Zu chungchang pawh sawiin CYMA President chuan, drugs kan chhiatpui ang thovin zu pawh kan chhiatpui, a ti a. Rangvamual leh Phunchawnga zu siamna hmunpui tam ta lutuk chu veiawm a tih thu a sawi bawk.
Zirna chungchangah ‘quality education’ a awm theih nan YMA chuan hma lak a tum tih sawiin, hei hi tunhnaia Biate-a YMA inkhawmpuiin a rel a ni, a ti. Education-ah hian tun aia hmasawnna tur hi kan nei a, theihtawp chhuahin YMA chuan sawrkar thlawp chungin hma lak a tum a ni, a ti.
MJA President C.Lalrambuatsaiha pawhin thu sawiin, YMA hruaitute leh MJA member-te inkawmhona hun tha tak buatsaih a ni chu lawmawm a tih thu a sawi a. YMA-in kumpuan atana ‘Ram leh hnam humhalh’ a hman leh chungchangah, tunlai boruak chu kum puan bawhzui nana hun tha nia a hriat thu sawiin, kan ramin chhung lam leh pawn lama beihna a tawh mek hi thiam taka do a pawimawh a ni, a ti.
Mizoram chhehvela Zofate awmnaa buaina chhuakah YMA hmalak dan chu fakawm a tih thu sawiin, hmun hrang hranga Zofate nen inpumkhatna nghet nei deuh deuh turin literature lama tanlak chhunzawm zel a pawimawh tih a sawi.
Inkawmhona hunah hian CYMA General Secretary Prof Malsawmliana chuan Central YMA hmalakna hrang hrangte a tarlang a. Central YMA leh sawrkar department thenkhat heng – PWD, Fisheries Deptt., PHED leh Samagra ten thawhhona thutlung (MoU) an neih dan te, MoU ziahpui lem lova thawhpui an neih zingah MSACS leh Forest Deptt an tel thu a sawi bawk.
Raltlan tanpuina dawn a nih dan sawiin tun thlenga Myanmar, Bangladeh leh Manipur atanga raltlante tanpuina sumfai lut chu Rs. 2,35,85,887 a tlin tawh thu leh, hman tawh zat chu Rs 1,65,80,584 niin hman ban Rs 69,01853 a awm mek thu a sawi a ni.
Inkawmhonaah hian CYMA hruaitute leh MJA member-ten ram leh hnam thatna tura ke penho dan tur zalen takin an sawiho a ni