A vawi ruk nan Australia an champion

Pathianni khan Cricket World Cup final khelh a ni a. Inkhel hmuhnawm takah Australia chuan a thlengtu India chu Wicket rukin an hneh a, a vawi ruk nan an champion.
Ahmedabad-a final ropui en a, India champion lawm turin mipui nuai khat zet an pungkhawm. India hian World Cup hmachhawn team kuate an hneh vek a, chak vek chungin semi-final an lut. Final-a an khingpui Australia ngei pawh hi inelna kal meka an hneh tawh an nih vangin hneh nawn lehin an champion rinna lian tak a awm. Champion tura rinkai zawk ni phak lo mah se team huaisen Australia an danglam, inlehthalna lian an thlentir a, mualneitu an sawp let.
Final-ah hian toss-ah Australia an chak a, fing taka thutlukna siamin ball vawm hmasak an thlang. Thutlukna an siam sual lova, India batsman te che hleithei lovin an siam a, India hian Over 50 chhungin run 240 an siam thei tawl a, target hautak an hnut-chhiah thei lo. India tana run siam hnem ber KL Rahul chuan ball 107 atangin run 66 a siam thei hram a. One Day International-a century siam hnem ber Virat Kohli meuh pawhin danglamna a thlen thei bik lova, Kohli hian ball 63 a hma-chhawn atangin hian run 54 chauh a siam.
India run siam 240 umin Australia in an vaw tan a, bul an tan tha hran lo. A tir lamah India tana ball vawmtute an chetha a, harsa lutuk lovin mi pathum an vawm out nghal mai a, an phurin champion turin inrintawkna sang tak an nei hman. Mah se, a rei tulh tulh a, Australia an chetha a, fielding tha tawk lo India an buai tulh tulh thung. Australia tan hian Travis Head leh Marnus Labuschagne te inkawp an chetha ta viau a, an pahnih inkawp hian run 195 zet an thawkchhuak ta mai a, hahdam takin an target an khum theih phah. Tichuan, Australia hian over 43-ah chak tura an mamawh run an siam a, wicket ruk ngawta hnehna changin, ropui takin an champion zui ta a ni.
Australia an champion theih nana thawhhlawk tak, India bowler te tibeidawngtu Travis Head chuan ball 120 a hmachhawn atangin run 137 zet a siam a, final-ah a hero hle. Travis Head-a kawppui fuh tak Marnus Labuschagne chuan ball 110 a hmachhawn atangin run 58 a siam ve bawk. India hian ODI-ah Australia an ngam lo fo thin a, vawi 151 an hmachhawn tawhah vawi 84 tlawm zawkah an tang a. An ngam loh than lakah an tlawm nawn leh ta a ni.