Everton an hrem

Sum hloh lama hriatthiam theih aia tam an hloh vangin Everton in hrem an tuar a, point 10 paihsak an ni. Point 10 ngawt paihsak an nih vangin Everton hi 14-na atangin 19-naah an tlahniam nghal a, point li chiah an nei.
Premier League-a club te hian kum thum chungin £105m zet an hloh a nih pawhin Premier League’s financial rules an bawhchhe lo va, £105m chin hi club in sum an hloh a nih pawhin ngainathiamnaa ngaihdam theih chin an ni. Hetihlai hian Everton hian kum 2021-22 chhung khan £124.5m zet an hloh tih hmuhchhuah a ni. Sum hloh phal chin aia tam an hloh tih hmuhchhuah a nih vangin Everton lakah hremna na tak lek nghal a ni a, point 10 paihsak an ni. Everton hi EPL club zinga hremna tuar na ber an ni nghal.
Everton in hremna an tawrhna angah hian point 12 thleng paih theih a ni a, Toffees hremna hi hremna na ber erawh a ni lo. Hetianga dan bawhchhiatnaah hian point 12 aia tam paih theih loh tih a ni deuh mai a. Point 12 chin hnuai lamah hi chuan dan lek kawhtute thutlukna siam ang ang kha club in hremna an tawrh tur chu a ni mai niin a lang.
Point 10 zet paihsaka hrem an ni ta mai chu Everton thuneituten hriat thiam har an tih thu an sawi a, an chunga rorelna chuan a tawng tak zet tih an sawi bawk. Hremna an tawrh mek hi khin let ngei an tum. Everton in hremna na tak an tuar hian hlet a nei thei dawn niin sawi zui a ni a. Manchester City leh Chelsea te chu EPL atanga tlahniam thei hial khawp hremna tuar thei an nih thu a thang chiam a, hei erawh hi chu khual thuthang a la ni rih.