Corruption leh thildangah mualphona liantham kan nei lo – Zoramthanga

MNF sawrkar chuan corruption leh thildangah mualphona liantham a nei loa, Pathian leh mipui zarah an sawrkar leh ngei a beisei tih chief minister Zoramthanga chuan a sawi.

Zirtawpni khan Aizawlah MNF National Executive Meeting neih a ni a. He hunah hian MNF president ni bawk Zoramthanga chuan Pathianin MLA tha tak tak 27 a pe a, an ni hian an bial theuhah theihtawpin tan an la a; hmasawnna ropui tak an kalpui mek hlawm tih a sawi. “Kan ministry hi corruption leh thildangah mualphona liantham kan nei lo a. Covid hri a leng chungin hmasawnna hna nasa takin kan thawk a, chu chu mipui hian an hria,” a ti.

Sawrkar an beihna ber financial management thiam lo, tih chu, sawi tawh angin Covid hrileng vangin Mizoramin a sum hmuh tur cheng vaibelchhe 3000 chuang a hmu loa, hei hian harsatna nasa tak a siam tih a sawi a ni.

Kumtawp lama inthlanpui hmachhawn turah Pathian leh mipui zarah MNF a sawrkar leh ngei a beisei tih MNF president hian sawiin, “Kan khingpuite en hian kan sawrkar leh ngei a rinawm zual,” a ti.

Congress chu central-ah an tlachhe vek tawh a, Mizoramah pawh an tlachhe tawh a, an arte lukawn thei hiala a hria thu a sawi. “Tling an awm pawhin an tam loang,” a ti. ZPM chu an dintirha an sawi zawng zawng an sawi ngam tawh lo tih sawiin, “Movement kan ni, party kan ni lo, an ti thin a; party an ni chiang ta em em a. Kohhran kan unit, an tih thinte pawh an sawi ngam tawh lo. A tira an sawi uar em em tuna sawi ngam tawh loh an ngah hle a ni,” MNF hruaitu hian a ti.

MNF National Executive Meeting hian MNF Headquarters term tawp tawh chu, inthlan kum a nih avangin pawisei a titlu a. Resolution paruk an pass bawk.