MNF National Executive Meeting-a resolution pass:

1. Khawvel pum Covid hrilengin a tihbuai laia Mizoram sawrkar Pu Zoramthanga kaihhruaiin rang taka hma la a, Pathian au chunga remhre taka kohhran leh tlawmngai pawl thawhpui a, inven dan tur fel tak a duan vangin nasa lutuk loa hri kan tuar ta hi a lawmawm kan tiin, chhuanawm kan ti a. Hrileng kara inkalpawh hleihtheih loa kan awm chung pawha nitin mamawh, ei leh bar, oil leh gas thlenga harsa lutuk loa vawiin kan thleng thei hi lawmawm kan tiin, kan chhuang takzet. He hri donaa tha leh zung, sum leh pai senga thawktu zawng zawng chungah lawmthu kan sawi a. Hriin min kiansan mek karah chak taka hmasawnna hna kalpui a ni zel hi kan lawm takzet a ni.

2. Mizoram leh Assam ramri buai meka Mizoram sawrkar Pu Zoramthanga kaihhruaiin huaisen taka a hmachhawn dan hi tha kan ti a. Ramri chhehvela hmasawnna nasa tak a thlen mek hi ropui kan tiin, kan ram humhalhna tura a hmalakna hi kan thlawp tlat a. He ramri buai chingfel tura sawrkar hotuten inbiakna hmanga hma an lakna hi tha kan ti.

3. Covid 19 hrileng avanga khawvel pumin sum harsatna a tawh lai a, Pu Zoramthanga kaihhruai sawrkarin mipui hnena SEDP a sem thei ta hi lawmawm kan ti a, chhungkaw tam tak tan malsawmna leh eizawnna kawng siamsaktu a nih avang leh, huamzau zawk leh nasa zawka kalpui zel tura sawrkar hmalakna hi kan chhuang takzet.

4. MNF leh India sawrkar inremna thuthlung anga Bangladesh sawrkar nen border trade hmanga insumdawn tawnna tur Mizoram sawrkarin chak taka hma a la zel hi tha kan ti a. Ram tan mellung pawimawh tak a nih dawn avangin lawmawm kan ti a ni.

5. Myanmar leh Bangladesh atanga Mizorama kan unau raltlante Mizoram sawrkar Pu Zoramthanga kaihhruaiin tha taka lo dawngsawng a, ei leh bar, chenna leh zirna nen lam pe a, vawiin thlenga a kuangkuah hi tha kan tiin, chhuanawm kan ti a ni.

6. Kan president Pu Zoramthanga hruaina hi kan chhuangin, kan ringtawk a. Kum 2023 a MLA inthlanpuiah pawh Pathian leh mipui zarah a kaihhruaina hnuaiah kan sawrkar leh ngei dawn nia lang hi lawmawm kan ti.