Ashok Gehlot-a’n Congress sorkar nawn ring

November 25-a Rajasthan Assembly election neih hmain Rajasthan Chief Minister Ashok Gehlot chuan a political future chu Congress High Command kutah a awm tiin a sawi.
Inthlan hnua a kal zel dan turah Chief Minister Ashok Gehlot chuan, “High command-in ti tura min tih apiang ka ti mai thin. Keima thuin thutlukna ka siam ngai lo. High command-in ti tura min tih ka ti mai ang,” tiin a sawi.
Rajasthan Chief Minister chuan anti-incumbency awm thei paltlangin Rajasthan-ah sorkar an siam leh ang a ti bawk a.
“Mipui ten tun tum chu sorkar ngai awm leh se an duh a ni. Seat 156 kan hnaih ka ring a. Rajasthan a kum nga dana sorkar inthlak thin chu kuminah chawhrehin a awm ang. Kan hnathawhah mipuite an lawm a ni. Rajasthan-ah chuan sorkar ngai bawk a sorkar leh ang” tiin Chief Minister Ashok Gehlot chuan a sawi bawk a.
“Kerala mipui ten Covid hun lai zawka kum 76 record chawkreha sorkar inthlak thin an thiah theih chuan Covid hnuah hna tam tak kan thawk a, Rajasthan mipuite Kerala mipuite aia an mawl bikna a awm lo, chuvangin Rajasthan-ah kan sorkar leh ang a. Bhilwara model chu WHO hial pawhin la in khawvelin a fak a ni. Covid laiin riltam an awm lo va, sakhua puithiam, activists leh NGO te nen kan thawkho a ni” tiin Ashok Gehlot chuan a sawi bawk.
Ashok Gehlot chuan Centre a sorkar chuan agency heng Enforcement Directorate te ang chu non-BJP sorkar paihthlak nan a hmang tiin a sawi bawk a.
“Heng ED, IT te hi an pawimawh a, an hnathawh tur zawk chu economic offender te chin chhuah a ni. Chu lam chu thlurbing se tichuan ram economy chakin economic offence a thleng lo tur a ni a. Kum kua chhung zet chu chuti lam hawi chuan hna an thawk tawh lo, sorkar paihthlak thupuiah neiin MLA te an vau a, an party chhuahsan tur tein an ti a. Madhya Pradesh, Maharashtra sorkar te chu ED hmanga nawrin IT ho hmanga dapin tihthlak an tum a. Hengte hi mipui ten an duh lo,” tiin a sawi bawk.
Ashok Gehlot chuan social scheme tam tak mipuite tana an kalpui thu a sawi bawk a. “Gig worker te tan dan siamin social security kan pe a ni. India ramah gig workers te tan dan siam duhna a awm a. Paltform service providers heng Uber, Ola, Zomato te ang te leh platform hrang hrang awmin chuta hnathawkte chu security nei miah lovin an awm a ni. Hengte tana dan siam chu Bharat Jodo Yatra ah khan rawtna dawn a ni,” tiin Ashok Gehlot chuan a sawi bawk.
“Mi tin te tan health insurance kan pe a. Chhungkaw pakhat tan guaranteed treatment Rs 50 lakh kan tiam bawk a ni” tiin Gehlot chuan a sawi bawk a.
Ashok Gehlot chuan Prime Mininster Narendra Modi chu sawisel thungin campaign lai pawha PM ni sia tawngkam mawi lo hmang a ti a.
“Prime Minister dinhmun hi a lian a, a thusawi pawh a zahawm tur a ni a, a thusawi a zahawm lo thung. Voters te hennah Congress sorkar khaihlum nan vote thlak rawh tih te ang te khan awmzia a nei dawn lo. Campaign naah tharum thawhna lam chi tawngkam hman tur a ni lo. Mipui te hamngaih leh ngainatna lantirin an tawng thei a, ngeiawm an duh leh puhna an kalpui duh pawhin tawngkam tam tak hman tur a awm a, polite thei ang berin an tawng tur a ni,” tiin Gehlot chuana sawi bawk.
Rajasthan hi November 25 ah an inthlang dawn a, December 3 ah vote chhiar a ni ang.
Assembly seat 200 awmah 199 ah inthlanna neih a ni ang a, Karanpur constitutency bik chu Congress candidate Gurmeet Singh Koonar a thih avangin inthlan thulh a ni.