World Endurance Championship-a tlan tur Mick Schumacher

Season tharah hian Mick Schumacher chuan car intlansiak ngaihsan hlawh zinga mi World Endurance Champion-ship-ah Alpine tan inelna a hmachhawn dawn.
F1 world champion tum sarih ni thei Michael Schumacher-a fapa Mick Schumacher hi tunah kum 24 mi ni ve tawhin, kum 2021 leh 2022 khan Haas tan car intlansiak level sangber Formula One world championship lamah hun a hmang a, Niko Hulkenberg chuan a rawn thlak ta a ni.
Season thara World Endurance Champion-ship hmachhawn chung hian a zawna a kum hnihna atan Schuma-cher hi Mercedes F1 reserve driver a ni zui leh bawk ang.
Tarlan tak angin, nikuma Haas-in German driver chhuahtira Hul-kenberg an rawih tak zawk hnu khan Mick hian Mercedes-ah F1 reserve driver nihna nen grand prix a thlirliam ta mai mai thin kha a ni a, F1 grid-a hmun a chan phak tak loh chungchang sawi-chhuakin, “Kumina racing ka hmachhawn ve pha lo hi hrehawm ka ti a, inelna hmachhawn hi ka naupan lai atanga ka chak leh duh ber a nih vei nen. Alpine nena thawhdun hi ka tan bung thar a ni,” a ti.
Season hnih chhunga grands prix vawi 43 a tlanah Schumacher hian tum hnih chiah point hmuh phak a nei a, a pa F1 legend hniakhnung a la zui fuh lo deuh niin a lang a, Haas pawhin chhawr zui duh loin, Mercedes-ah thlaveng a ni leh ta rih a, kum tharah pawh hian seven-time world champion Lewis Hamilton leh George Russell-te kaih-za a veng leh dawn a, driver pahnihte theihloh thuta intlansiak hma-chhawn thei chauh tur a ni leh dawn.
Schumacher hian single-seaters nghenga seilian a nih thu leh cockpit-a hun hman chu a driving skill tihmasawn zelna atana pawimawh a nih thu sawi chungin tlankawnga driver dangte leu kual vel thlir chu harsa a tih thin thu a tarlang tel.
Formula One lamah hmun chang lo mah se car intlansiak dangah kum thar hian a inlan dawn a; a car khalhna tur World Endurance Cham-pionship an tih hi car class hrang hrang huapa intlansiak series pakhat niin, he series-ah hian intlansiak lar 24 Hours of Le Mans race pawh a tel nghe nghe.
Nakkum March thla khian Qatar ramah an tan ang a, November thlaa a hmawr an bawkna tur pawh Arab ram tho Bahrain a ni.
Alpine team tan hian Mick Schumacher bak-ah French driver rual-khat – Nicolas Lapierre, Matthieu Vaxiviere, Charles Milesi leh Paul-Loup Chatin-te bakah Austrian Ferdinand Habsburg-te paw’n race an hmachhawn ve bawk ang.