North Korea in US hmaihnih neiah puh

North Korea chuan United States chu a hmelma South Korea in US territory atanga spy satellite a kahchhuah remti a, North Korea satellite kahchhuah sawisel lawi si a hmai hnih nei tiin a sawi.
Karkalta Zirtawp khan South Korea chuan a ma siam spy satellite chu California a Vandenberg Space Force Base atangin a kapchhuak a. North Korea chuan November 21 khan a lo kapchhuak tawh a ni.
South Korea kahchhuah ang lo takin north korea satellite kahchhuah kha chu Washington, Seoul ten na taka sawiselin UN Security Council resolution bawhchhia an ti a. Khawvel chuan North Korea chuan ballistic technology te chu a missile technology test nan a hmang a ti a. North Korea chuan satellite kahchhuah leh missile test turin dikna a nei a inti ve thung.
US in North Korea in satellite a kahchhuahin dan kalh tiin na takin hrekna nen a vau laiin South Korea chuan spy satellite a kahchhuah a remti tho hi hmai hnih a neihzia lantirna a ni, tiin North’s National Aerospace technology Administration chuan thuchhuah siamin a tarlang.
North thuchhuah chuan US chu gangster ang maia a chet remtih a nih chuan khawvel remna leh muanna atan a pawi dawn a ni an ti bawk a.
North Korea chuan a spy satellite chuan US leh Souht Korea a hmun pawimawhte White House leh pentagon te thlalak te pawh a thawn chhuak tawh tiin a sawi bawk a. Mahse, pakhatmah chung thlalak pholanna chu a la nei lo va, mithiam te chuan North satellite chuan high-resolution imagery a neih an ring lo bawk.
North Korea chuan spy satellite dang hmelma te chetlak dan fiah zawka en theihna tur leh missile hmanga kah fuh chat theihna tur a kapchhuak leh dawn tiin a sawi bawk.
South Korea pawhin SPaceX nena contract kum 2025 thleng daih an siam hmangin spy satellite dang a kahchhuah leh tur thu a sawi bawk a. Chung hmang chuan US spy satellite te hmanga North Korea hmun pawimawh a enthlak te chu chhawk zanghkhaiin a awm thei dawn a ni a ti bawk.