Khan-a chhuah phuta kawng zawh hmain a farnu man

Pakistan-a police-te chuan prime minister hlui lung in tang mek, Imran Khan-a farnu, Aleema Khan-i chu Punjab province khawpui, Lahore-a a chenna inah man a ni.
Pathiannia man a ni hi Khan-a kaihhruai Pakistan Tehreek-e-Insaf (PTI) party-in September 27-a a chhuah phuta kawng zawh an tum hma lawk a ni.
Lahore-a police hotu lian chuan Khan-i man a nih thu hi a sawi a, a kimchang erawh a sawi lo va. Lahore deputy commissioner-in manna tur thupek hi a chhuah a, Punjab-a Maintenance of Public Order (MPO) dan tlawhchhanin ni 30 hren theih a ni.
Dan tlawhchhan hian vantlang himna atana tul a nih chuan thuneituten mi an hreng thei a ni.
“Aleema Khan-i hi a lirthei khalhtu nen zingah an chhuak a, police-in dan lova manin hmun hriat lohvah an hruai a ni,” tiin a dan hre mi, Rana Mudassar Umer-a chuan X-ah a tar lang.
“Aleema Khan-i hi Lahore-a thubuai a neih zawng zawngah bail a ni a, tunah hian eng buaina nge, khawiah nge, eng police station-ah nge dah a nih pawh hriat a ni lo,” a ti.
Khan-i man chungchangah hian sorkar chuan engmah sawi an la nei lo.
Inrinni khan Interior Minister Mohsin Naqvi-a chuan PTI-in kawng zawh an tum hi dan tumin sorkar chuan a tih theih apiang a ti dawn niin a sawi tih Reuters news agency chuan Pathianni khan a tar lang.
PTI chuan Khan-i man a ni hi an dem a, dan lo nia sawiin rang taka chhuah an phut a. “Hei hi dan a ni lo va, dan lova man a ni a. Dawihzep taka boruak tihchhiat tumna a ni,” tiin an thupuangtu, Sheikh Waqas Akram-a chuan X-ah a tar lang.
“Upa tawh, prime minister hlui lung in tang mek farnu chu a nuta dan dik lova man, enkawl that loh leh damdawi pek pawh theih loh a nih chungchanga a ngawih theih loh avangin a in bulah man a ni,” a ti a. Khan-i hi kum 70 chuang a ni tawh tih a tar lang tel.
Kum 73 mi, Khan-a hi August, 2023 atang khan tantir niin an party chuan politic thil vanga manah an puh.
A hriselna, a bikin a mit ding lam tha lo chuan ngaihven a hlawh a, a thiam bikin enkawl a ngai a, hei hi PTI pawhin chhuah a nih theih nana an kar chhan lian ber a tling.
Thla hmasa khan an ram Supreme Court chuan Pakistani thuneitute chu prime minister hlui hi an khawpui, Islamabad-a mi mal damdawi in, Shifa International Hospital-a enkawl turin thu a pe.
Thupekah hian Khan-a hi a thubuai ngaihtuah a nih leh hma zawng enkawl tur a ni tih a dan hre mi chuan a sawi.
Thuneitute hian rei lo te inentir turin sorkar damdawi in, Pakistan Institute of Medical Sciences (PIMS)-ah an hruai zawk a, a mi mal doctor an hmuhtir lo va, an party chuan court sang ber thu zawm loh niin an sawi.