SEDP sum khawih chet loh tur MSSSB leh SEDP Board thiat

Chief minister Lalduhoma chuan SEDP sum awm mek chu khawih chet rih loh turin a ti a. Mizoram Subordinate Services Selection Board leh SEDP Board bakah Resource Mobilation Department chu thiah nghal a ni tih a sawi.Zirtawpnia larsap-in rinawmna thu tiamtira chief minister atana a lakluh hnua thuthar thehdarhtute a kawmnaah sawrkar tharin a tih tur leh tih loh tur a tihte a puang a. Sawrkar ni atanga ni 100 chhunga an tih tur point 12 a sawi. Hei hi sawrkar official-te pawhin lo chhinchhiah a, bawhzui tura chahin official-a lehkhaa inhriattirna chuan a zui dawn tho tih a hrilhlawk a ni.
Chief minister chuan mi pawi an sawi palh leh rilru tih nat an lo neih tawhnaah ngaihdam a dil hmasa a. Sawrkar bul tanna turah tunhmaa thil lo kal tawh inchhui vak vak lam an rilru ah a awm loh rualin, tun atang chuan diknaa ro rel tan tawh hnua tisual leh chungah chuan an khauh hle dawn tih a sawi.
Kan ramah, a bikin inthlan dawnah dawta inpuhna a nasa thin a, hetianga inpuh thinna hian ram politics a tibal zual, tiin, he thil hi an enzui anga, social media-ah fake account hmanga tlanchhe chunga mi bei chu an chhuichhuak zel tawh dawn tih a sawi.
Political transfer chu tih loh hram an duh rualin, loh theih loh awm chin a awm thei tih a sawi a. Politic avanga transfer lo tawk tawhte erawh an chungchang an rel lo thei lo tih a sawi a ni.
Sawrkar official-ten zalenna an neih chu a takin hmang se a duh tih Lalduhoma hian a sawi a. Opinion poll-a anmahni mai bakah an chhungte thlenga ngaihdan an sawi tha ngam thin lo chu sawrkar hnathawkten an tih loh tur chin, ramri kham sa hre chungin an duh zawng leh duh loh zawng sawina right chu hmang se a duh tih a sawi. “Sawrkar hnathawkte tunhma anga chep taka siam kan duh loa, zalenna in neih ang ang tha taka ram leh hnam tana in hman kan duh a ni,” a ti.
Minister tin office-ah complaint box leh suggestion box an dah anga, mitinin rawtna an neih leh an sawisel duhte thehluh theih a ni anga, hei hi ngun takin an lo en thin dawn tih a sawi. Online-a tih theih dan pawh ruahman a ni dawn tih a sawi bawk.
Sawrkar pian atanga ni za chhung atana tih tur chief minister hian a puang a, budget thar an neih hunah kum khat chhunga priority an duang leh dawn tih a sawi.