Kumin chu, Kangmei Ven Hapta thupui atan “Thapui thawhin kangmei chhuak tur i veng ang u” tih hman a ni a. Kum tin Lo hal thin state tan chuan hetiang thupui hi hman a ngai reng a ni.
-- Advertisement --
Mizote hi hnam naupang tê, mahse kan naupan ngaihtuaha hma sawn chak zek si kan ni a. Khawvel hmasawnna huanga ke kan pen luh ve tan atanga kum 100 vel lek chhungin keini aia kum za tam taka hma lo sawn (civilized) tawh zawkte kawng tam takah kan lehpel leh thei hial a, hma kan sawn chak tih loh rual a ni lo. A lehlamah, hma kan sawn dan erawh hi chu a khingbai thin mai pawh a.
Hetia kawng hrang hranga hma kan sawn chak viau rual hian, hma kan sawn theih miah lohna lianpui mai a awm a, chu chu— kum tina ram hal kang dur dur chunga eizawnna ‘thingtlang loneih’ (shifting cultivation) tun thlenga kan la bansan/kalsan thei miah lo hi, a ni.
Ram kaihhruai hna thawk tura mahni intawktarh a, mipui hnena vote zawnga ‘hnathawh kawr min haktir rawh u’ ‘ei leh bara intodelh turin hma kan la ang’ ‘keini hi kan tling ber, chutiang khatiang chuan kan ram hmasawnna turin kan ti dawn’ etc. etc. tia mipui hmaa intiam thin ten, ram kaihhruai hna an han thawh hian, an intiamna leh an insawi angin engmah tihpuitlin an nei ngai lo a, chuvanga tun thlenga ‘Thapui thawhin kangmei chhuak tur i veng ang u’ tih thupui hman ngaia la awm reng hi kan ni, a tih theih ang.
India ramah kum tin ramngaw hloh tam ber state kan nih dan te chu kan hre hlei hlui tawh; hei hian kan ram environment a sawp chhe mek a, global warming avanga environment humhalh nana thingtlang lo neih bansan tura thapui thawh zawk awm tak kan nih laiin, kan hal kang sauh sauh a, ‘thapui thawhin kangmei i veng ang u’ kan ti leh si a; hei hi chu thil mak (weird) a tling.
Inthlanpui kum kan thleng a, dan pangngai angin November thla chawhnu lama inthlang tur kan nih a rinawm a; thla sawm erh awrh chauh hun a awm ta. Politician-te hian ram leh hnam dinhmun siamthatna tur policy ngaihtuah miah lovin, inthlana tlinna tur ngawr ngawr policy chauh hi an buaipui leh ang a, manifesto pawha environment siamthatna lam hawi policy liantham hmuh tur a awm leh pek lo a nih chuan, nakumah te, kum lehah te pawh ‘Thapui chhuaha kangmei ven” bak tih theih kan nei leh lo mai dawn tihna a ni. Ram kaihhruai hna thawk tura inpete hi chuan ram hnuk thil, ‘ei leh bara intodelh’ leh ‘environment siam that’ hi ‘priority’-ah an neih a hun takzet zet tawh a ni e.