Ram leh hnam tana tha lo turah chuan na takin kan dodal dawn – Lalchhandama Ralte

Sawrkar chu ram tana tha turah chuan an thlawp anga, ram leh hnam tana tha lo tur nia an hriat chuan na takin an dodal dawn tih leader of opposition Lalchhandama Ralte chuan a sawi.
Thawhlehnia Assembly Session-ah opposition leader hian speaker sawmna anga thu sawiin, Mizoram Assembly-ah opposition party-ten kalphung an lo neih, speaker dinhmun zahawm se an duh avangin chuh loin uncontest-in an kaltir tih a sawi a. ZPM sawrkar thar an lawmpui tih a sawi a, ram tana tha turah chuan an thlawp anga, constructive opposition nih an tum tih a sawi. Chutihrualin ram leh hnam tan tha lo tura an hriatah chuan nasa takin House atangin mipui thlavang hauhin an dodal dawn tih a sawi a ni.
Speaker dinhmun chu dinhmun zahawm a ni a, opposition tan phei chuan an pa ber, an mamawh leh tul an thlenna ber a nih angin an innghahna ber tur a ni tih a sawi a. Sawrkar protocol-ah pawh chief minister dawttu a ni, tiin, House lo kaihruai tawhtute chu House chhungah pawh senior leh experience nei tha an nih tlangpui laiin, mithar, mah se, mihring quality-ah he hmuna thu tura mi tha tak a nih ngei an beisei a, an thlamuanpui a, an theihna chin chinah thlawp turin an inruahman tih a sawi.
Speaker dinhmun chu veteran politician-te chan thin a ni a, House zahawmna chu speaker kaihhruainaa a innghah avangin senior member an lo beisei tih a sawi a. House leader ngei pawhin senior member a zawng tih an lo hria a, he chair pawimawh tak hi chutiang zingah chuan luah tur an hmu zo loa, a mawm leh ban sei an zuan zawk nia a lan avangin, corruption free sawrkar siam tumtute ah ngaihthat lohna lek lek a neihtir tih Lalchhandama Ralte hian a sawi a ni.
Opposition leader bakah hian BJP leh Congress member ten thu an sawi bawk.