Assembly 9-na thukhawm tan Speaker-ah Lalbiakzama thlang

Mizoram State Legislative Assembly 9-na thutkhawm hmasa ber chu Thawhlehni khan neih tan a ni a. Chuhtu awm loin ZPM MLA Lalbiakzama chu speaker atan thlan a ni.Assembly thutkhawm hi speaker lailawk atana ruat MLA Lalfamkima’n kaihruaiin member tharte rinawmna thu tiamtirin a lalut a. Lakluh inkhawm neih zawh hian speaker thlan tur niin, eptu member atangin speaker chuhtu an awm loh avangin treasury bench lamin speaker atana an rawt, Chalfilh bialtu MLA Lalbiakzama chu tlingah protem speaker hian a puang zui a, House leader Lalduhoma leh leader of opposition Lalchhanama Ralte ten a thutna turah an thlah a, protem speaker hnen atang hian chair a la nghal a ni.
Speaker thar chuan Mizoram State Assembly rorel chu speaker leh member kal hmasa ten zahawm takin an vawng thin a.House zahawmna leh inkaihhruaina tha an lo hnutchhiah tawh chhawmnun tum a ni anga, state dang Assembly House thenkhat anga inauhbuai leh chetla mawi lo tak tak awm lohna tia sawi kan nihna chu vawnnun an tum tlat dawn tih a sawi.
“Ram kalsiam sawihona tur a ni a, kan ngaituahna uluk takin hmang ila. Khairual takin rorel kan tum anga, neutrality maintain kan tum ang. Mimal inbeihna ang chi, ram hnuk hlat lutuk pumpelh hram hram tum ila, chutihrualin kan chanvo leh privileges kan hman tangkai theihna turin kalpui tum a ni dawn,” a ti.
House member-te chu an ngaihtuahnaah mimal aiin mipui ngaihpawimawh fo turin a chah a. Inpawh leh innel tlang takin House kalpui an tum dawn tih sawiin, an inpawh leh innelna chu an chaklohnaah inngaih sak lo turin a chah lawk bawk.
Assembly thutkhawm tan hma hian Assembly Conference Hall-ah MLA tharte pual inhlanna hun hman a ni a. Parliamentary Affairs minister Vanlalhlana’n kaihruaiin Synod moderator Rev R Vanlalnghaka’n MLA tharte Pathian hnenah a hlan a ni.
Thutkhawm hi vawiin – Nilaini hian chhunzawm a ni anga, larsap-in House a address hnu ah lawmthu sawina motion putluh a ni anga, inkhawm an tin zui ang.