Buhfai atangin…

Sawrkar thar kum hmasa ber hi insawhngheh kum atana hman an tum tih chief minister-in a sawi a. Hma thar la tur pawhin tanhmun han lak ve deuh a ngai dawn tih chu, leibat tam dan atangin a hriatthiam theih mai awm e.
Hetih lai hian, state insawhnghehna hrim hrim atana pawimawh hmasa ber nia lang ta chu, kan rin pui ber ‘buhfai’ thar chhuak tam zawk tura hmalak hi a ni. Buhfai leina atana kum tin cheng vaibelchhe 250 vel state danga kan thehthang ziah mai hi kan tihtawp hmak theih loh pawhin a zatve aia tam hi chu kan hum ve thei tih kan ram leilung atang hian a lang chiang em em tawh a ni.
Tun dinhmunah, Mizoramah hian leileta siam theih ram awl tha hectare 74,644 a awm a, heng zinga hectare 16,008 chu chu leiletah siam mek niin, leileta la siam loh hi hectare 58,636 (78.5%) a la awm a ni.
Kum 2021-22 chhung khan Mizorama buh tharna atana ram kan hman zau zawng chu hectare 34,097 niin, heng zinga hectare 17,899 chu thingtlang lo (jhuming) neihna a ni. Leilet leh thingtlang lo atanga buh thar zat hi 2021-22 chhung khan Metric Tonne 60,881 a ni bawk a; hei hi Mizoram thla hnih tla tia sawi thin a ni. Thingtlang lo neihna hi a zau zawk fe a, mahse a tharchhuak erawh a tlem zawk fe zawk thung. Tuna leilet atana kan la siam loh ram awl tha hi siam a nih chuan, a lo berah Mizoram mipui kum chanve ei chu a tharchhuak thei tih a lang a; chumi hlut zawng chu cheng vaibelchhe 125 (Nuai 12,500) vel tihna a nih chu.
Kan ram tharchhuah ngei buhfai hi Mizoram sawrkarin a lei bawk chuan, ram chhunga sum pai vir vel a tam phah sauh dawn bakah, leilet zau tak kan neih belh chuan, chu chuan mi tam tak eizawnna a siam belh nghal dawn tihna a ni bawk. Heng leileta siam theih ram awl awm mekte hi tum tak tak chuan kum nga chhungin a siam puitlin theih ngei a rinawm a ni. Buh tam tak thar chungin ramngaw zau tak kan humhalh nghal bawk dawn tihna a ni a. Leilet siam hian hamthatna tam tak a chhawm tel tihna a nih ber chu.
Kum tin ramngaw zau tak tichhe zawnga buh kan tharchhuah ve te hian, FCI lama buhfai quota a beng hniam phah bawk si loha hetia buhfai lei nana cheng tam tak khawhral reng chunga awm hi kan kumkhaw nihphung ni tur atan chuan a lungchhiatthlak lam deuh chu a ni. Sawrkar thar hian kalphung thar hnuaiah intodelhna thar hi han sual chhuak hram teh se.