WTA Player of Year Swiatek

World number one Iga Swiatek chuan a award kawl lai humhimin a zawna a kum hnihna atan WTA Player of the Year chawimawina a dawng zui leh a, kum 2012 atanga 2015 chhunga he chawimawina lo dawng tawh tennis legend Serena Williams hnu lama he title kum zawna la leh thei hmasaber a ni.
Kum 22 mi Pole hian kuminah a career-a vawi-thumna atan French Open title hlawhchhuakin, a career-ah Grand Slam title pali a la tling a; a tumkhatna atana WTA Finals trophy changin, Aryna Sabalenka laka a hloh zawk hmeichhe world number one nihna a lakir a, WTA Player of Year award a chang nawn leh.
Storm Hunter leh Elise Mertens kutah Doubles Team of the Year award lutin, Chinese Zheng Qinwen chu Most Improved Player atan thlan a ni a; Russian Mirra Andreeva kutah Newcomer of the Year award a lut thung.
Nau a neih avanga hun engngemawchen chawl vang vang Elina Svitolina chu kumin April thla khan khel-mualah inelna hmachhawn turin a kirleh a, Roland Garros quarter-final a thlen bakah a Grand Slam result neih thatber hun tluk turin Wimbledon semi-final a lut zui leh a, Comeback Player of the Year chawimawina dawng tura thlan a ni hi a phu thlap niin a lang.
Swiatek nena thawk-dun Tomasz Wiktorowski chu Coach of the Year a ni.
Ons Jabeur of Tunisia kutaa Karen Krantzcke Sportsmanship Award leh Peachy Kellmeyer Player Service Award lut kawpin, Jessica Pegula of the US chu khelmual pawna tennis tihhmasawnna kawnga a thawhhlawk avang leh charity lama a thawhthat avangin Jerry Diamond ACES Award hlan a ni ve bawk.