Asian Cup khel lo tur Ali
Kum thar January ni 12 atanga Qatar rama khelh tan tur AFC Asian Cup atan India mipa team head coach Igor Stimac chuan squad remkhawm hna a tan chho mek a, karliamta Ningani daih tawha squad la thlitfim leh tur a tarchhuah zinga tel central defender Anwar Ali chu kheimit hliam avangin paih leh a ni.
A kheimit dinglam ruh khi avangin kum 23 mi hi player 50 hming tarchhuah phawt atangin thaichhiat a ni a; defender pawimawh a chhawr thei lo tur hi Croat tan hian hlohna lian tling dawnin a lang.
Anwar a kalbo a ngaih tak avang hian tlarhnung lama India innghahna lian turte chu Sandesh Jhingan, Pritam Kotal leh Subhasish Bose-te an nih a ngaih hmel.
Anwar-a Mohun Bagan team-mate Ashique Kuruniyan pawh khup hliamin a la bawhbuai mek a, probable squad-ah pawh hian a lang ta lo reng a ni.
Igor Stimac-a player pawimawh dang Meitei midfielder Jeakson Singh pawh dar na avangin a la pangngai lo a, Kerala Blasters footballer hian player 23 awmna final squad a luah zui zel thei dawn em a chiang lo.
FIFA ranking thar bera 102-na luah mektu Blue Tigers hi Group B-ah awmin, Round of 16 luh an tumna kawng hmasaber turah January ni 13 khian world no 25 Australia an tum ang a Stimac-a team hian Uzbekistan (January 18) leh Syria (January 23) an hmachhawn zui leh ang.
Mizo pali telna India team la thlitfim leh tur hian December ni 30-a national camp lut tura Doha an pan hmain nakkum tournament khel tur member 25 an tifel zet dawn a, hetah hian Lalchungnunga, Lalengmawia Ralte, Lallianzuala Chhangte leh Jerry Mawihmingthanga-te la inhamtang zo tak ang maw?
India probable squad
Goalkeepers: Gurpreet Singh Sandhu, Amrinder Singh, Vishal Kaith, Dheeraj Singh Moirangthem and Gurmeet Singh Chahal.
Defenders: Naorem Roshan Singh, Bikash Yumnam, Lalchungnunga, Sandesh Jhingan, Nikhil Poojary, Chinglensana Singh, Pritam Kotal, Hormipam Ruivah, Subhasish Bose, Asish Rai, Akash Mishra, Mehtab Singh, Rahul Bheke, Narender Gahlot and Amey Ranawade.
Midfielders: Suresh Singh Wangjam, Rohit Kumar, Brandon Fernandes, Udanta Singh Kumam, Yasir Mohammad, Jeakson Singh Thounaojam, Anirudh Thapa, Sahal Abdul Samad, Glan Martins, Liston Colaco, Deepak Tangri, Lalengmawia Ralte, Vinit Rai, Ninthoinganba Meetei and Naorem Mahesh Singh.
Forwards: Sunil Chhetri, Rahim Ali, Farukh Choudhary, Nandhakumar Sekar, Siva Sakthi Narayanan, Rahul KP, Ishan Pandita, Manvir Singh, Kiyan Nassiri, Lallianzuala Chhangte, Gurkirat Singh, Vikram Partap Singh, Bipin Singh Thounaojam, Parthib Gogoi and Jerry Mawihmingthanga.