Artist 100-ah Taylor Swift a la No.1

Taylor Swift chu Billboard Artost 100 chart-ah No.1 a ni a, he chart-a a No.1 tawh zawng zawng belhkhawm chu kar 89 a tling tawh a, he chart-a No.1 ni ngun ber a nihna a sawh nghet leh ta sauh a ni. Billboard Artist 100 hi kar khat chhunga US-a zaithiam lar dan tehna niin, chart ranking siam nan hian kar khat chhunga album leh hla hralh tam dan te, radio airplay leh streaming te chu tehna pawimawh a ni.
Taylor Swift hian a album leh hla a la hralh tha tluang zel a, a album ‘1989 (Taylor’s Version)’ chu Billboard 200 (albums) chart-ah No.2 a la ni a, a album dang ‘Midnights’ chu No.6 niin, ‘Folklore’ pawh No.9 a la ni a, a album dang pasarih chart-ah a la lang thei bawk. Billboard 200 hi kar khata album hralh tam dan atangin ranking an siam thin. Billboard Hot 100 (singles) chart-ah pawh a hla ‘Cruel Summer’ chu No.7 a la ni a, a hla dang pali chu chart-ah a lang thei bawk.
Korean pop group ATEEZ chu No.2 niin, anni hian an album thar ‘The World EP.Fin: Will’ chu Billboard 200 chart-ah No.1 an kaipui a, hei hian Artist 100 chart-ah pawh a vawrh sang ta a ni.
Billboard Artist 100 Top 10:
1 Taylor Swift
2 ATEEZ
3 Morgan Wallen
4 Drake
5 Zach Bryan
6 SZA
7 Michael Buble
8 Olivia Rodrigo
9 The Philly Specials
10 Luke Combs