Faina thlentute chawimawi

Faina kawnga phutlet nei loa hma la tha, PHE Department leh Central YMA tangdunin an thlante pualin Thawhlehni zan khan Aizawlah ‘Faina Thlentute Ni’ hman niin, chawimawina thilpek hlan an ni.
He hun hmanpuitu PHE minister Prof. Lalnilawma chuan fai tura sawrkar hmalakna hrang hrang duan thin chuan nasa takin hma min sawntir a, hei hi sawrkar bakah khawtlang hruaitute leh mimal thahnemngaite tanrualna vang a ni, tiin a sawi. “Ram leh hnam hmasawn tur chuan a chhunga cheng mipui kan pawimawh a, kan theihna zawnah theuh theihtawp kan chhuah hian rahbi thar kan kai thin a, tuna faina thlentute hi thangtharten entawn a, he mawhphurhna hi chhunzawm zel tura fuihtu a nih ka beisei,” a ti.
PHE Department hian faina kawnga hmalakna atan Central YMA bakah Central Young Lai Association, Mara Thalai Pawl Gen. Hqrs. leh Central Young Chakma Association a thawhpui a. An hnuaia branch theuhah kalpui a ni. Central YMA nena thawhdunnaah hian ramchhung hmun hrang hrang atanga thlan mi 46 chu chawimawina pek niin, heng mite hi phutlet nei lo leh mahni thahnem ngaihna vanga khawchhung leh veng faina atana hma la thinte an ni.
Faina Thlentute hian chawimawina thuziak bakah sumfai, memento, thangchhuah diar leh puan chei an dawng a. Central YMA leh PHED CorCom chuan he hun hmang hian faina lamah mipui kaihharha an awm chu an tum ber a ni tih an sawi.