Banerjee-in common PM candidate duh lo

Trinamool Congress chuan Congress leh Left te nen West Bengal-ah ‘three-way alliance’ neih theihna kawng a inhawng tiin party president leh State Chief Minister Mamata Banerjee chuan a sawi a. Mahse, common Opposition Prime Ministerial candidate neih erawh Lok Sabha inthlan turah a duh lo thung.
Banerjee hian Opposition INDIA bloc meeting neih turah tel turin Delhi a thleng tawh a.
Congress tena caste census neih an ngiat chungchangah erawh zawhna a chhang duh lo thung a. Chu mai bakah INDIA bloc ah Mahujan Samaj Party supremo Mayawati-in a zawm a remti lo bawk.

‘TMC ten tute pawh thawhpui thei’
West Bengal-a seat-sharing kalpui dan turah zawhna tam tak tawkin Banerjee chuan ‘tu emaw chuan zawhte Thi a awrhtir a ngai a lawm’ tiin a sawi a. Congress leh Left party te chuan Assembly inthlanpui hnuhnung berah khan an thawk dun a ti bawk a. Congress-te chuan State a Lok Sabha seat 42 awmah pahnih an nei mek a, Left ten seat khat pawh an nei lo a ti bawk a.
‘Three-way alliance’ Congress, left leh TMC te kalpui theih a ni em tia zawhna chu, “Tute nen mah intihthiamlohna kan nei lo. TMC hi tute nen pawh kan thawkho thei vek” tiin a chhang a. Mahse, party dangte chu an rilru lam an siam That hmasak a ngai a ti a, BJP te nen pawha thawkho tawh an ni, a ti bawk.
INDIA bloc meeting neih hnuhnun ber Mumbai-ah khan Banerjee chuan seat-sharing formula chu a hma thei ang bera siam fel a ngai tiin a lo sawi tawh bawk a. Seat-sharing tih fel vat chu kum 2024 Lok Sabha inthlan hmachhawn tura thil pawimawh hmasa ber a ni a ti bawk. Seat-sharing chinfel chu tuna meeting neih tura agenda pawimawh ber anga ngaih niin mahse Banerjee chuan thil awlsam a ni dawn lo va, policy pawm tlan hmasak a ngai dawn a ti bawk a. Seat-sharing tihfel harin nghawng a nei ang em tia zawhna pawh ‘thlen hman loh ai chuan thlen tlai a Tha’ tiin a sawi bawk.

PM tur chu inthlan hnuah
Trinamool Congress chief chuan Prime Minister Narendra Modi term thumna chelh tum mek lakah common Prime Ministerial candidate siam a hnawl bawk a. Tun hmain coalition prime minister Deve Gowda leh I.K. Gujral te pawh an lo awm tawh tiin prime minister tur chu inthlan zawh hnua ngaihtuah ni se a ti bawk.
Trinamool Congress chuan Opposition unity an duh tia sawiin, “Opposition leader te kan inthurual thei a nih chuan anti-BJP voter ten an inthurual thei ang,” tiin a sawi bawk a. Seat-sharing lam sawihona an neih hmain a pawimawh hmasa ber chu ‘ram chhung mipuite an ni’ a ti bawk.
Caste census chungchangah zawhna Tum hnih zawh niin Opposition camapign theme ber a ni ang em tia zawh pawh a chhang duh Thak lo thung. Mumbai-a INDIA meet hnuhnung berah khan major campaign point atana caste census neih chu a lo hnawl tawh a ni.
Mayawati chungchang bikah Banerjee chuan BSP chief chuan INDIA alliance a zawm lovang ‘a ma buaina tawk a nei’ tiin a sawi bawk a. “Party tin te hi Central investigating agencies ten min vil vek a ni” a ti bawk.
Parliament-a buaina kal zela Opposition MP te hnawhchhuah phuk phukah pawh INDIA alliance MP te chu an inlungrual hle a. Lok Sabha a Trinamool Congress leader Sudip Bandyopadhya pawhin, “BJP te hian Opposition te hmehmih min tum a ni. INDIA alliance meeting neihnaah hmalak zel dan tur kan sawiho ang,” tiin a sawi bawk.
INDIA alliance meeting neih turah Parliament buaina mai bakah nakum Lok Sabha inthlan atana seat insem dan tur chu an chinfel theih beisei a ni tawh a. Thukhat vua a BJP te paihthlak chu tum ber a ni.