Delhi-ah India leh Bangladesh inbe dawn

India leh Bangladesh chuan an inkar tihthat thar lehna atan inbiak an tum hnai a, a bik takin sumdawnna leh palaite inpawhna thilah an inbe dawn niin a hriaten an sawi a. Hetih lai hian Bangladeshi Prime Minister Tarique Rahman-a’n New Delhi a tlawh dawn em tih erawh a la chiang lo zel.
Bangladeshi team hian Nilaini khan New Delhi an thleng a, Ningani leh Zirtawpniah Indian aiawhte nen an inbe dawn niin hemi lam hriate chuan an sawi a. Dhaka-in a thlen tur ram palai ve vete inbiakna tur pawh ruahman an tum bawk ti an sawi.
Ram pahnihte hian an inkar siam that leh tumin hma an la mek zel a. Bangladesh-a zirlaite kaihhruaiin August, 2024-a Sheikh Hasina-i sorkar paih thlaa prime minister hi India-a a tlanchhiat hnu leh amah thlaktu, Muhammad Yunus-a kaihhruai sorkar lailawk a din hnu khan an inkar hi a chhe hle.
India chuan February inthlana Bangladesh Nationalist Party (BNP)-in hnehna changa sorkar an siam hnuah an inkar tihthat leh tumin hma a la nghal a, Rahman-a pawh an ram tlawh tur leh Brics Summit-ah Bimstec chairman a nih anga tel turin a sawm a. Bangladeshi sorkar erawh chuan thla liam taa summit-a tel lo hi thlangin prime minister-in a tlawh hun tur hi an la tichiang thei lo.
Bangladeshi team hi Thawhlehnia thlenga Nilaini leh Ningania inbiak tuma ruahmanna siam hmasak a ni a; mahse, an zinna turah harsatna a awm thut avangin a ni hi an sawn niin thil hriate chuan an sawi a ni.
Dhaka chuan sumdawngna thila inbiakna neih zawhah hian ram pahnih commerce secretary ve ve inbe tur angin a sawi a; mahse, Indian lam hian hemi atan hian inkalpawhna leh ramria sumdawnna telin, tih hmasak ngai a awm niin a sawi ve thung tih an sawi.
Palaite inbiakna tur ruahmanah pawh ram pahnih inkara neuh neuh tam tak sawi a nih a rinawm a, heng zingah hian visa pek chhuahnaa harsatna awmte pawh a tel dawn niin thil hriate chuan an sawi bawk.
India hian October thlaah tlawhtu pawimawh tak tak a neih avangin Rahman-a’n a tlawh theihna hun remchang a dap ve a ngai a. Swiss President Guy Parmelin leh Polish Prime Minister Donald Tusk-a ten an tlawh tawh a, Prime Minister Narendra Modi-a chu Philippines-ah November 16-18 chhunga Asean Summit-a tel turin a zin a ngai bawk.
Modi-a hian December-ah pawh hun a nei chep hle a, US, Canada leh Belgium tlawh tura ngaih a ni a. Rahman-a pawh October-ah Japan a zin dawn a, November-ah Türkiye leh Saudi Arabia a tlawh zui dawn bawk.
Rahman-a’n India a tlawh mai lo hi ram pahnih inkara neuh neuh a awm piah lamah an hun neihin a zir rih lo deuh hrim bawk niin thil hriate chuan an sawi.