Airport cheithat leh Tlawng lei dawh mek minister-in en

On Dec 22, 2023 15 0

Public Works Department minister Vanlalhlana chuan Tlawng lei dawhthat leh Lengpui Airport sakthat hna kalpui mek chu Ningani khan a hmunah a enfiah.
Minister chuan hmasawnna ruhrel pawimawh tak zawh hun tur bituk baka hun pawhsei, Tlawng lei dawhthat leh Lengpui Airport sakthat hna thawh chu ruahmanna siam anga zawhfel thuai a nih theih nan tan la turin contractor-te a chah a. Hna tlo leh tha, ram leh hnam tana chhawrnahawm tak siam a nih theih nan theihtawp chhuah turin a chah. Department aiawha hna viltute pawh hna kalpui mekte uluk taka enzui a, thuneitute hnenah harsatna thlen thuai thin turin a chah a. Sawrkar kaltlanga in sak leh hmasawnna ruhrel dang siam chu quality tha leh tlo a ni tur a ni, tiin a sawi.
Chak zawka hma lak a nih theih nan leh hna kal mek zawhfel thuai a nih theih nana tulte leh ruahmanna siam zel dan tur ngaihtuah ho a ni a. Lengpui Airport runway cheithat chungchang pawh PWD hotuten minister hnenah thlenin, pavement classification number (PCN) value chu thlawhna lian zawk tum theihna turin Directorate General of Civil Aviation (DGCA) bituk anga tihsan a tul thu leh runway pavement-te falling weight deflectometer (FWD) hmanga siamthat chungchang leh tul dangte an thlen. Minister hoin uluk zawka inrawnkhawm a, hmalak zel dan tur ngaihtuah ho leh nise, tih a ni.

4Tlawng lei dawh that mek, steel arch (semi through) bridge hi sawrkar laipui Ministry of Road Transport & Highways hnuaia thawh a ni a, Mizoram PWD-in hmalakna a vil a, EPC mode-in Poddar Infratech Pvt Ltd-in lei dawhthat hna a thawk.
4Lei dawh thatna atan hian Rs. 36,99,00,009 ruahman a ni a. Kumin October-a zawhfel hman tura tih chu pawtseiin, 2024 March hian zawhfel hman tum a ni. Tunah hna zaa 74.25 vel zo tawh anga chhut a ni.
4India rama inclined network arch bridge hmasa ber tur niin, metric tonne 432 vela rit a ni dawn. A sei zawng metre 100, a dung metre 7.5 leh a sanna lai berah metre 17-a sang tura ruahman a ni.
4Lei dawh bakah hian a panna kawngpui Aizawl lamah metre 180-a thui leh Lengpui lamah metre 265.300 a thui siam tum a ni.
4Lengpui Airport sakthat hna hi hlawm hniha then a ni a. Terminal building cheithat hi SCA/SASCE sum nuai 2764.83 senga thawh niin, contractor chu Zoramchhana a ni. Terminal building pannaa kawng chhawng siam chu NESIDS sum nuai 1959 senga sak niin, contractor chu Kamlova Chhangte (KR Construction) a ni.