MJA-in puihna hlan

Mizoram Journalists’ Association Gen. Hqrs. chuan kumtina an tih thin angin Charity Fund an khawn leh a, hemi atang hian Civil Hospital Aizawl (CHA) leh Manipur Zofate tan an luangchhuak.
Charity Fund-ah hian MJA member-te sum thawhkhawm bakah thahnemngaih puitu mi thenkhat thawh hmangin kumin hian Manipur buaina avanga mahni in leh lo tlanchhiat san mekte puihna atan Rs 26500 leh kumtina an pek thin Civil Hospital Aizawl Poor Fund-ah Rs. 50000 an hlan.
Civil Hospital hnenah hian Ningani khan puihna hi an hlan a. MJA president C Lalrambuatsaiha chuan CHA hi Mizoram mipui nawlpui pankhawm, khawsak harsa zawkten an pan ber a ni a. He damdawi in pantu zingah khawsak har tak tak awm thinte chu damdawi ina thawkten damdawi leinate an tumsak thin tih an hriatin, chu’ng mi harsate puihna atan an neih ang tawk an thawh ve tih a sawi a ni.
CHA medical supenrintendent Dr Zoramthanga chuan MJA-in an damdawi in an rawn hre thin chu an lawm hle tih sawiin, an puihna hi damlo harsate tan tangkai taka hman a ni dawn tih a sawi. Mi thenkhatin Krismas puala damdawi ina awm mi harsa zawkte an pui thin chu a hlut em em rualin, Krismas vuakvetah chauh lo pawh damlo rethei tak tak an awm reng avangin Poor Fund-a dah hi a hlu lehzual tih a sawi a ni.
Civil Hospital-ah nurse an indaih lo nasa hle tih sawiin, zan lama nurse duty pakhat zelin damlo 30 chuang an vil thin a; sawiselna an dawn tam tak chu a awm lo hran lo tih a sawi a ni.
Thisen var an tlachham deuh reng a, thisen pek lamah thalaite kan tan mar zel a ngai tih a sawi bawk.