Argentina-ah lungawilohna lantir zui

Argentina sorkarin economic shock policy a kalpui duh lovin mi sang tam tak Buenos Aires kawtthlerah pungkhawmin lungawilohna an lantir a.
President Javier Milei chuan sum hman tihtlem leh currency hlutna tihhniamte chu hmalakna hmasa pawimawhah a nei a ni.
Hei bakah hian economic reform decree-ah hming ziah hnan bawkin export limit siam a ni dawn bawk a. Lungawilohna lantirnaah hian hnathawh tur nei lo aiawh pawl ten hma an hruai a. Police ten kawngpui an dan chah loh nan an veng ve thung.
Karhnih kaltaa thuneihna chang President Milei chuan a ruahmanna te tihkhawbaw tum group te lakah hremna na tak an lekkawh tur thu a lo sawi lawk sa tawh thung a.
Sorkar chuan lungawilohna lantir te chuan state atanga tanpuina an dawn thin an dawng thei lovang tiin a vau thung a.
“Tharum tel lova lungawilohna lantir a ni,” tiin Eduardo Belliboni, leftist protest group Polo Obrero chuan a sawi thung a. “Intihbuaina hrim hrim kan duh lo va, inepna neih pawh kan duh hek lo,” tiin a sawi.
Radio leh TV katlanga thusawina a neihah President Milei chuan an hmalakna kalpui thar tur 300 chuang sawi lanna neiin chung zingah chuan state company privatise te, mining leh industry lam siam that te, property rent lam dan awmsa thiah te pawh a tel a.
“Kan tum chu kan ram siamthat a ni a, kan zalenna chawinun leh mimal tin tena autonomy kan neih humhim niin chumi tur chuan kan economic growth thlen thei lo regulation hrang hrangte tihtawp a ni,” tiin a sawi.
Kar kalta khan sorkar chuan an currency chu US dollar lakah a hlutna 50% in a lo tihniam lui tawh a. A hmaa US dollar khat leh 391 pesos intluk vel chu tunah chuan 800 pesos velah a awm tawh a ni.
Kum 2019 atang khan Argentina chuan a currency chu nasa taka humhim tuma hmalakin ruahmanna a lo siam tan tawh thung.
Economy Minister Luis Caputo chuan public spending pawh nasa taka tihniamin chung zingah chuan fuel leh transport subsidy te pawh tihniam vakin sorkar in contract leh advertising lama a sum dah te pawh a tihniam vak bawk.
Argentina-ah hian inflation sang tak awm mekin thil man sanna chu nikum nena khaikhinin 150% vel lawih a i mek a. Hei mai bakah hian cash reserve a nei tlem bawk a, sorkar in leiba a ngah em em bawk a, a mipui 40% vel zet chu below poverty line a awm mek an ni bawk.
Argentina sorkar hmalak tum dan chu $44 billion zet a batsak International Monetary Fund chuan ‘huaisenthlak’ ti thungin private sector than len zelna tur kawng a inhawng ang a ti.