Israel-in Lebanon a beihnaah mi pali thi leh

Israeli-ten Lebanon chhim lama beihpui an thlak lehnaah mi pali an thi a, mi pariatin hliam an tuar bawk niin Lebanese chanchinbuten an tarlang.
Sorkar hnuaia mi, National News Agency (NNA) chuan inkahhai bawhchhiaa Israeli sipaite chetna thar ber tuarte pui tura an tlan laiin damdawi thiam pahnihin hliam an tuar bawk tih a tar lang.
Damdawi thiamte hi a hmaa beihpui thlakna tuarte buaipui tur niin thlawhna hmanga Nabatieh-a Toul-a Islamic Health Society nena inzawm civil defence team-te kahnaah an hliam niin NNA chuan a sawi.
Nabatieh-a Ebba khawpuiah thlawhna hmanga beihpui thlaknaah mi pahnih an thi a, mi pangain hliam an tuar bawk.
NNA chuan Bint Jbeil district-a Haris khawpuiah drone-in car a fuh a, mi pakhat a thi a, a unaupa pawh a hliam bawk tih a tar lang.
Israeli indo thlawhnate hian Sajd-a municipal chief hlui chenna in an bei a, Kfar Rumman leh Safad al-Battikh-ah te beihpui thlakna dang a awm bawk a. Thi leh hliam zat erawh hriat theih a ni lo.
Pawikhawihna thlen hma hian Israel sipaite chuan Lebanon chhim leh khawchhaka khawm pakuate tihluihna hmanga insawn chhuak turin a ti hmasa.
Khuate Nabatieh-a Rihan, Jarjou, Kfar Rumman, Nmairiyeh, Arabsalim leh Harouf te, Lebanon khawchhak lama Jmayjmeh, Mashghara leh Qlayaa te an ni.
X-ah sipai thupuangtu, Avichay Adraee-a chuan khaw chhungah Hezbollah inbun an awm a tih avangin mi chengte chu insawn chhuak turin a ti a ni.
Israeli sipaite chuan ramri bulah Hezbollah-in drone an kah hmangin sipai pakhat a thi tih an sawi ve bawk a. Lebanon chhim lamah pawh Israeli sipai pathum chu booby-trap drone puak vangin an hliam bawk.
Israeli sipaite leh Hezbollah hi April 17 atanga inkahhai an puan leh May thla lai hawl thlenga pawh sei kalpui mek mah se an inkap tawn zel.
Lebanon chhinchhiah danin March 2 atang khan Israeli beihpui thlaknaah Lebanon-ah mi 2,840 vel an thi tawh a, mi 8,700 velin hliam an tuar tawh a, hmun him dang panin mi maktaduai khat chuang an insawn phah tawh.
US chuan Ningani leh Zirtawpni hian Washington-ah Israel leh Lebanon inkara remna zawnga inbiakna nei leh turin a inbuatsaih mek a. Hezbollah chuan Lebanon sorkar a tel avangin a sawisel nasa hle.