Eng party mahin an kalphung hlui ang chuan min hneh lo ang – Lalduhoma

Kum 5 ral leh hnu ah ZPM pawt thla thei khawpa inbuatsaih turin opposition party-te chona thianghlimin a cho duh tih Lalduhoma chuan a sawi a. Eng party mahin an kalphung hlui ang chuan an hneh tawh dawn lo tih a sawi. Thawhtanni khan ZPM chuan kum 2024 atan party office an hawng a. Party leader, chief minister Lalduhoma chuan ni 100 chhunga thawh tura an duan tam tak an tihlawhtling tawh a, theihtawpin hma an la mek zel tih a sawi. “Opposition party-te hi chona thianghlima cho kan duh a, kum 5 a ral leh hunah ZPM let thla tur khawpin inbuatsaih rawh se. Tun atang chuan eng party mahin an kalphung hlui ang kha chuan min hneh tawh loang,” a ti.
Officer pension tawh, sawrkar atanga hamthatna la an la awm tih an hriat thu sawiin, “Chu’ng mite chu reilote chhunga inchingfel turin warning kan pe a, hei hi kan warning tawpna a ni tawh ang. Mipui chhiah tlingkhawm, a hman lohna tura hmang an awm chuan corruption a ni a, endiktu leh enthlatu kan ruat tawh a, engkim chiang takin kan hre zel tawh dawn,” a ti.
Assembly bial 13-ah an duhthlanna leh zalenna hmang thei lo an la awm chu pawi an tih thu a sawi a, a dang bial 27-te ruala ke an pen ve theihna turin an dawmkang ve zel dawn a, an thlauhthla dawn chuang lo tih Lalduhoma hian a sawi.
“Kan thalaite tan kawng a inhawng dawn a, eng pawl nge tih leh eng party nge tih lam kan sawi dawn lo. He ram siamtha tur hian kan zavaiin kan leng vek a, hna kan thawk tlang dawn a ni. Entrepreneur-ten company rintlak thawhpui tur zawng ula, kan lo pui dawn che u a ni,” a ti.
Road Transport & Highway minister Nitin Gadkari hnenah kum khat hun pe tur leh kum khat chhunga an thawh theih fiah turin a dil a, hna chak taka kan thawh theihna turin Aizawl Eastern by-pass road, sawrkar hmasain a lo buaipui tawh hma lak nghal a nihna turin sanction an nei tawh tih chief minister hian a sawi.
Hna kal lai, loh theih loha chhunzawm ngai a awm a, cancel ngai erawh engemawzat awmin heng sum chuang bang hi ba rulh nan an hmang dawn tih a sawi a. Sairang leh Seling inkar by-pass road NHIDCL-in an khawih tur chu Engineering Procurement and Construction (EPC) system hman a ni dawn a, he kawng hi double lane a ni dawn tih a sawi a ni.
“Bawngkawn Brigade atanga hmar lam hretah lei kan verh anga, Tuirial pawh thlain Seling thlen hma Phaibawk kawnah National Highway No.6 a pawh ang. He kawng hi km.34 a ni dawn a, kawng pangngai aiin km.22 in a hnai zawk ang. Leiverh (tunnel) tur bik hi sum min release thei rih loa, mahse kan dil hnuah Road Transport & Highways minister hian leiverhna tur bik atan cheng vaibelchhe 1313.28 min remtih sak a, he hna hi a chak thei ang bera thawh kan tum dawn a ni,” a ti.