Kum tharah raltlan lut thar

Raltlante luhna ber pakhat Zokhawtharah raltlan
lut thar an la awm reng a, kum tharah pawh lut thar an awm leh nual tawh.
Champhai district-a Zokhawthar-ah hian a khaw mi aiin raltlan an tam zawk; he khuaah hian mi 4000 vel an cheng a, raltlan awm mekte hi mi 6201 vel an ni.
An VC president Lalmuanpuia chuan kum tharah pawh an khuaah raltlan lut thar an la awm tih a sawi a, “Lut thar hi an la awm pheuh pheuh reng a, a hlawmin an rawn lut rih lo a, mahse an awm pheuh pheuh reng,” a ti.
Raltlan lut tharah hian in-report aiin in-report lo an tam zawk a rinawm thu a sawi a, chhungte bel, ngawi renga lut chu a tam zawk an nih a rinawm thu a sawi.
In-report lovah hian duh huna kir leh, mahni khaw lama kira Zokhawthara let leh, chutianga kar tawn chu an awm tih a sawi a, Zokhawthar hnaih khua atanga raltlanah chutiang chu an awm nual tih a sawi.
Tun hnaia raltlan lut thar hi chu Zokhawthar hnaih khua an ni vak tawh lo tih a sawi a, khaw hla tak tak atanga tlanchhia an nih thu leh, an khaw hnaiha mite hi chu a tlanchhe tur ang chu an tlanchhe tawh nia a lan a thu a sawi.
Mizoram hnaih ni lo khua atanga lut hi an pung deuh deuh dawn nia an rin thu a sawi a, sorkar sipaite hian thlawhna leh bomb hmangin hmun hrang hrang an bei a, chuvangin him lova inhria an tam nia a lan thu a sawi. Chawlhni liam ta velah Khampat bul Kanan khua pawh thlawhna hmangin an bei tih an hriat thu a sawi a, anni lam pawh Zokhawthar hnaih an ni lo chungin, an tlanchhia a nih chuan Zokhawthar leh Champhai district khaw dangah an kal an rin thu a sawi.