Ration buhfai la ngai lo tan card thlak turin ngen

Food Civil Supply & Consumer Affairs department chuan ration buhfai lak mamawh lo tan, document tul danga ration card hman theih tho turin ‘Not Entitled for Ration (NER) Card’ a thlak turin mipui a ngen a. Thlak theih dan a kawhhmuh nghal.
FCS&CA department thuchhuak chuan, ration buhfai hi mi harsa zualte ei leh bara chhawmdawlna tur a ni a. Mizoram thenawm – Tripura, Arunachal Pradesh, Assam leh hmun dangah chuan sawrkar laipui atanga a thlawna state-ten buhfai an dawn bak chu an sem meuh loa, Mizoramah chuan mipui harsatna hrethiamin sawrkar sensoin ration card var hmangin mipui nawlpui hnenah retailer kaltlangin buhfai man tlawm zawka leina remchang siam thin a ni tih a sawi.
Hun inher zelah ration card var hmang chhungkaw tam takin ration buhfai an la lo nachungin, ration card neih an duh a. Chu chu sawrkarin a ngaipawimawh piahlamah, tam takin an ration card neih chu sawrkara surrender an duh tih hriain ration buhfai lakna tur ni lo, chhungkaw member tihchianna atana document pawimawh tak ni si, Not Entitled for Ration (NER) Card chu kum 2019 atang khan sawrkarin a siam ta tih a sawi a ni.
Ration card chu thil pawimawh hrang hrang tih nana document pawimawh a nih avangin hman tulna a awm thin a. Hetiang mite tan liau liau hian sawrkarin a kalpui mek sa, mahni ration card hman lai ration buhfai lakna tur ni lo, NER card-a thlak duh tan FCS&CA official website- https://fcsca.mizoram.gov.in/page/ration-neilo-not-entitled-for-ration-ration- card-duhte-tana-dilna tihah online-in office dawr kher ngai loa dil theih a ni tih a sawi.