Gakpo a hmanhmawh mah mah – Koeman

Netherlands national team manager thar Ronald Koeman chuan Dutch rawlthar duhawm Cody Gakpo chuan Liverpool a zawm hma mah mah nia a hria a hriat thu a sawi.

Kum 23 mi Cody Gakpo hi Dutch club lian PSV Eindhoven leh Netherlands tan a khel tha thei viau. Season kal mekah PSV tan Eredivisie-ah vawi 14 khelin, goal 9 a thun a, assist vawi 12 zet a nei tling hman bawk. Qatar World Cup-ah Netherlands in quarter-final an thlen theih nana Gakpo hian a thawhhlawk viau bawk a, World Cup 2022 ah khan vawi nga khelin, goal thum a thun. PSV leh Netherlands tan a chetthat theih em vangin club lian zawk ten an ngaihven leh zual. Club leh ram tana khel tha tak Gakpo hian January thla khan Premier League club lian Liverpool a zawm ta nghe nghe a ni.

Netherlands leh PSV tan khel tha viau thin mah se Gakpo hian Premier League-ah beisei a phak lova, a club thar Liverpool tan goal a la thun lo. Beisei anga bul a tan that loh vangin Gakpo boruak a hniam a, hun harsa a tawk mek. Hun khirh takin a tlakbuak mek Gody Gakpo hi Netherlands manager Ronald Koeman chuan Liverpool a pan hma mah mah nia a hriat thu a sawi.

Manager tawnhriat ngah Koeman hian Dutch Eredivisie leh English Premier League chu level insan hleih tak mai a nih thu a sawi hmasa te te a. Gody Gakpo ngei pawh hi a talbuai zui mai a hlauh thawn ruk thu a sawi tel bawk. World Cup zawh rual khan Luis van Gaal chuan Netherlands manager hna a chawlhsan zui nghal a. Club pakua lai enkawl tawh leh Netherlands national team ngei pawh lo enkawl tawhtu Ronaldo Koeman hi a vawihnih nan Netherlands manager a ni zui leh ta a ni.