United an tlang ve leh
rd round khelh chhunzawm a ni a. FA Cup a hnuhma nei tha tak Manchester United chuan si hnih faiin Wigan Athletics an hneh a, fourth round an lut. United hian fourth round ah team lian an pumpelh a, round sang zawk thlen theihna hun tha an nei.
FA Cup-ah vawi 12 zet champion tawh Manchester United hi English Premier League hnuai, hnuai leha awm Wigan Athletics hmachhawn turin DW Stadium-ah an lenglut a, nuamsa taka hnehna chang tura rin lawk an ni. Wigan lakah si hnihin chak tho mah se rinlawk ang em ema nuamsa in an chak thei bik lo thung a. Hei hi FA Cup ropuina a ni.
League One team Wigan hian an mikhual team lian lakah bul an tan tha a, goal thun theihna hun tha tak an nei hmasa. Inkhel tan tirh lamah fuh zeta United an nawr tlang hnuin Martial Godo chuan goal thun theihna hun tha zet mai a nei a. Yard 6 leka hnai atanga a pet chu United si nghakin tha zetin a lo dang a, an team a chhanhim.
Goal an chhuah teuh viau hnuin United an insiamtha zui nghal a, goal an thun zui ta thuai. Marcus Rashford chuan fuh zeta a khalh tlang hnuin hlauhawm zetin a pet a, Rashford pet na tak hi Wigan si nghak Sam Tickle chuan pui zetin a lo dang hman tlat thung. Rashford hian a hun tha neih vawi hnihna pawh a chhawr tangkai thei lo zui leh. Goal thun lo mah se Rashford hian defender Diogo Dalot tan tha zetin a chhawpsak a. Dalot hian minute 22-naah mawi taka pet goal in, hmahruaina goal a thun.
Dalot goal thun hnuin United an khel tha zual sauh a, hlauhawm an siam zui mawlh mawlh. Rashford, Rasmus Hojlund leh Scott McTominay ten uiawm taka an hun tha an hloh hnuin rawlthar ngaihven hlawh Garnacho chuan goal bar a pet per dawp bawk a, uiawm takin a goal lo hlauh a, Red Devils in goal an thun belh thei lo.
Chawlhlawk hnu lamah pawh United in an hun tha neih an hloh leh tlut tlut a, goal thun an harsat chhunzawm zel. Goal an thun belh theih loh reng hnuin hun tawp dawn hnaihah penalty an hmu a, an vannei ve ta nge nge. Minute 74-naah captain Bruno Fernandes chuan penalty a hlawhchhuak. A hlawhchhuah penalty hi Portuguese midfielder hian awlsam takin a pet goal a, an goal hnihna a thun. United hian si hnihin hnehna an chang zui ta a ni