Designated Survivor changtupa a thi

TV series lama hriat hlawh tak Designated Survivor leh The Cleaning Lady changtupa Adan Canto, kum 42, chu appendiceal cancer avangin an rama January ni 8 khan a thi.
Adan Canto hi FOX series The Cleaning Lady leh ABC series Designated Survivor changtupa niin, FOX chuan, “Adan Canto a kal ta tih kan hriat hian min thawng tak zet a ni. Actor tha leh thian duhawm tak a ni a, kum 10 chuang liamta a ‘The Following’ a chan atanga Warner Bros. Tevelision leh FOX Entertainment chhungkaw zinga mi a ni hi kan inchhuang a ni,” tiin thuchhuah an siam a, “Sawi hleihtheih loh khawpa channa nasa a ni a, a nupui Stephanie leh a fate leh a hmangaihte kan tawrhpui tak zet a ni. Adan hi kan ngai dawn hle mai,” an ti bawk.
Adan Canto hi Ciudad Acuna, Coahuila, Mexico-ah December ni 5, 1981 khan a piang a, kum 16 a tlinin rimawi lama hlawhtlinna zawngin an in a chhuahsan a, chumi hnuah stage acting-ah All About My Mother-ah inlanin, lemchan lamah a kal ta zawk a ni.
2013 khan FOX drama series ‘The Following’-ah Paul Torres lema changin TV-ah a inlan tan ta a ni. Film lamah pawh 2014-a tlangzarh ‘X-Men: Days of Future Past’ leh 2017-a ‘Amanda & Jack Go Glamping’ bakah 2020-1 Halle Berry film direct ‘Bruised’-ah te pawh a chang. Canto hian film tawi pahnih a direct tawh bawk a, 2014 khan ‘Before Tomorrow’ leh 2020-ah ‘The Shot’ te a direct hman a ni.
Adan Canto hian a nupui Stephanie leh a fate pahnih- Roman Alder, kum 3, leh Eve Josephine, thla 18 te a kalsan a ni.