Melbourne Park-ah Radu tlang phawt

Australian Open kal mek hmeichhe singles result lawrkhawm leh zung zung ila. Nimin khan 2021 US Open champion Emma Raducanu chuan 6-3 6-2-a Shelby Rogers hneh chungin bul a tan a, Melbourne Park-a vawithum a inlannaah first round a la paltlang vek.
Briton hian nikum Australian Open hnu lamah khan major tournament a khel leh ta lo vang vang a; a banrek leh kheimit hliam zai a nih avangin thlariat dawn a chawl a, British number one ni thin kha ranking lamah pawh tlahniam duai tawhin 296-na a ni tawh.
Thawhlehni khan Melbourne-ah bul a tan a, a chipui Katie Boulter, Jack Draper leh Cameron Norrie-te hnungzuiin first-round match a paltlang ta phawt a ni.
Kum 21 mi Raducanu hian naktuk second round inkhel pakhatah Chinese Wang Yafan a tum leh ang.
Grand Slam title pali hawn tawh chunga Australian Open semi-final la pel zo lo World No. 1 Iga Swiatek pawhin nimin first round inkhel dangah 7-6 (7-2) 6-2-in 2020 champion Sofia Kenin a hneh.
Swiatek hian Melbourne champion hlui a paltlang hnuah tu pawh hmachhawn turin a inpeih tih a sawi.
Poland nula hian top seed ni chungin bul a tan a, a hmachhawn leh tur hi he hmuna vawihnih lai champion ve tawh Angelique Kerber thawnhawtu 2022 runner-up Danielle Collins a nih miau avangin Swiatek tan fiahna lian a tling ang.
Melbourne khawpuia 2022 final a luhna kawngah American Collins chuan Swiatek kha semi-final pakhat zawkah a paltlang a, tuntum hian a bultanna inkhelah 6-2 3-6 6-1-in Kerber a hneh a, Swiatek kal zel tur dangtu a ni leh dawn em kan thlir ang.
Three-time Grand Slam champion Kerber hian fa a hrin avangin thla 17 zet in lamah hun a hmang a, khelmualah a kirleh ta a ni.
Tarlan tawh thin angin, Swiatek hian French Open title pathum bakah 2022 US Open title a la tawh a, a chetthat kal tluang leh mekin 41st-ranked Kenin a hneh kha a zawna match 17 a chakna a ni tawh.
Thawhlehni first-round inkhel dangah Belarusian 18th seed Victoria Azarenka chuan Italian Camila Giorgi lakah 6-1 4-6 6-3 hnehna changin, second round lamah Danish world No. 100 Clara Tauson a tum zui leh ang.
Russian 14th seed Daria Kasatkina chu American Peyton Stearns lakah 6-2 3-6 6-2-in a chak.
US Open champion hlui Sloane Stephens pawhin 6-3 6-1-a Australian wildcard Olivia Gadecki a hneh.
Thawhtanni inkhel
Melbourne Park-a kum 2019 leh 2021 champion Naomi Osaka chu France player Caroline Garcia lakah 6-4 7-6 (7-2)-in a tlawm.
September 2022 US Open hnu lama major tourna-ment a khelh leh vawikhatnaah nikuma a fa hmasaber hring Japanese Osaka chuan 16th seed a paltlang zo lo.
Australian Open ni hnihnaa tla langsar zingah Wimbledon champion Marketa Vondrousova a tel bawk.
World number 7 Vondrousova hi Ukrainian qualifier Dayana Yastremska lakah 6-1 6-2-in a tlawm teh ngawt a, he thu buatsaih lai thleng hian round one paltlang zo lo zinga seed changsang ber a ni rih.
Kum 23 mi Ukrainian Yastremska chuan indonain a tihbuai an ram lama a pi chenna in chu tunhnai khan rocket-in a kap fuh tih a sawi.
An ram chhunga indona kal mek sawichhuaktu Ukrainian dang Elina Svitolina pawh first round paltlang zingah telin, 19th seed hian minute 59 lek chhungin Australian wildcard Taylah Preston chu 6-2 6-2-in a sawp.
Tunisian sixth seed Ons Jabeur lakah minute 67 chhungin Ukrainian qualifier Yulia Starodubtsewa chu 6-3 6-1-in a tlawm thung. Kum 29 mi hian Mirra Andreeva leh Bernarda Pera inkhela chak zawk zawk a tum ang.
US Open champion Coco Gauff chu harsa lo takin first round-ah a chak a; American mihang tleirawl kum 19 mi hian nikum September thla mai khan US Open-ah a Grand Slam title hmasaber hlawhchhuakin, Melbourne-ah pawh hian champion tum tana paltlang ngai langsar zinga rinluh niin, Slovakian nula Anna Karolina Schmiedlova lakah bul a tan a, 6-3 6-0 hnehna nuamsa a sualchhuak phawt.
Croatian 21st seed Donna Vekic chu 6-4 6-4-in Russian Anastasia Pavlyuchenkova lakah a tlawm a; Czech 31st seed Marie Bouzkova pawh a chipui tleirawl kum 19 mi lek Linda Noskova lakah 6-1 7-5-in a tlawm.