Paris Hockey-a India hmabak a ko

Lalremsiami Hmar telna India hmeichhe hockey team-in kumin Paris Olympics hmeichhe hockey tourna-ment an khelh phak dawn loh laiin mipa hockey team erawh Paris 2024 men’s hockey competition khel turin an tling a, group stage-a an sut turte erawh an hautak dawn!
Asian Games champion leh Tokyo Olympics bronze medallist ni bawk India hi Pool B lamah Olympic champion lai Belgium, hockey palian kumhlun Australia, Rio Games gold medallist Argentina, New Zealand leh Ireland-te nen an awmho.
Olympic-a vawiriat champion tawh India hian kum 41 chhung zet Olympic medal an hawn zawh tawh loh hnuin Tokyo Games-ah khan bronze medal an hawn leh ta nawlh a, kumin erawh World No 2 Belgium tihte nen an awmho nawk dawn avangin knock out round lut tur pawhin an hmabak hi a ko hle dawn niin a lang.
India hi world ranking-ah pathumna ni mekin, an chungah Belgium leh No. 1 Netherlands an awm a, Tokyo silver medallist Australia leh team khawng dang Argentina an sut a ngai dawn bawk.
Pool A lamah Netherlands, Germany, Great Britain, Spain, France leh South Africa an awmkhawm ve thung.
FIH Hockey Olympic Qualifiers an khel zo a, Pathianni khan International Hockey Federation chuan Paris Games atana men’s and women’s hockey competition draw a tichhuak a; tarlan tawh angin, Paris khaw women’s competition bikah Tokyo Games-a palina India nulate an tel pha lo a; karliamta Zirtawpni khan Ranchi khawpuia Olympic Qualifiers pathumna inchuhah sikhat faia Japan an hneh loh avangin Paris Olympic an thleng zo ta lo chiah chiah a ni.
Ranchi tournament-a finalist team pahnih bakah pathumna tan Olympic ticket dah a ni a, a thlengtu India chuan palina an hauh avangin Paris an thleng zo lo a, an hneh loh pathum Germany, USA leh Japan an tlang ta a ni.
Hmeichhe lamah hian reigning Olympic champions Netherlands chu Pool A lamah Belgium, Germany, Japan, China leh a thlengtu France nen awm hoin, Pool B-ah silver medallist ni lai Argentina, Australia, Great Britain, Spain, USA leh South Africa an awm.
Paris hockey tournament-ah hian mipa leh hmeichhe team 12 ve ve an-a inlan dawn a; tarlan tawh angin team tel turte hi Pathianni khan tihfel niin, FIH World Rankings zulzuiin an pool awmna tur hi remchhuah a ni.
Paris Olympics hi kumin July ni 26 atanga August ni 11 thleng awh tur niin, hockey competition pahnih bik hi July ni 27 atanga August ni 9 chhunga khelh tur a ni thung.