Wheelchair singles final lut Hewett
Nikuma Australian Open and US Open singles title latu Alfie Hewett chuan Mel-bourne Park-a a title kawl lai humhim turin Australian Open men’s wheelchair singles final a lut leh ta a, defending champion leh eight-time Grand Slam singles winner ni bawk Briton hian semi-final pakhat zawkah Belgium player Joachim Gerard chu 6-4 6-1-in a hneh.
Hetih lai hian semi-final lehlamah Hewett-a doubles partner leh British professional wheelchair tennis player ve bawk Gordon Reid erawh Japanese Tokito Oda chuan 7-6 (7-4) 7-5-in a dangchat a, 2016 champion Reid leh a thianpa Hewett chu final-ah an intum thei dawn ta lo a ni.
Hewett leh Reid tangdun hian doubles semi-final lamah Japa-nese pair Daisuke Arai leh Takashi Sanada hmachhawn tur an nih laiin an match khelh tur hi ruahin a bumro a, an result tarlan theih a ni lo.
Andy Lapthorne leh a American team-mate David Wagner tangdun pawhin wheelchair dou-bles semi-final lehlamah Australian Heath Da-vidson leh Canadian Robert Shaw hma-chhawn tur an nih laiin ruah vang bawkin a hunah an inkhel thei lo a, vawiina khelh atan dah a ni ve bawk.
Australian Open hmeichhe singles semi-final match hnih result pawh tarlan hman a ni ta lo a; last four match pakhat zawkah cham-pion Aryna Sabalenka chuan nikum US Open final-a a ngam loh Coco Gauff laka phuba lak ngei tumin khelmual a lut a; semi-final dangah Ukrainian qualifier Dayana Yastremska leh Chinese 12th seed Zheng Qinwen-te’n an career-a a tum khat-na’na Grand Slam fina-list nih tumin chak zawk nih an inchuh ve bawk.
Tarlan tawh thin angin, Nikum Septem-ber thla Flushing Mea-dows final-ah khan Belarusian Sabalenka chuan American mi-hang tleirawl Gauff kha a hneh lo teh tlat a; nimina semi-final an khelh hma khan Saba-lenka hian phuba lak a duh takzet tih a sawi-chhuak nghe nghe.
Kum 25 mi chuan Coco nena intum chu inbeihna ropui a tling zel tih sawi chungin semi-final match-a an insu leh tur kha a phur takzet tih a tarlang tel.
Inrinni Grand Slam hmeichhe singles final luh inchuh danga kum 21 Zheng leh kum 23-a upa Yastremska inkhela a tlang zawk zawk hian grand slam champion thar nih theihna hun remchang an nei dawn a, final-a an sut tur chu tu pawh ni se a awlsam dawn lo thung.