Australian Open Champion thar Sinner

Australian Open 2024 chu pathianni tlai khan mipa final hmuhnawm tak hmangin khar a ni a. Daniil Medvedev lakah set hnih a hloh hmasak zet hnua hnehna chang let Jannik Sinner chu Australian Open champion thar a ni.
Australian Open 2024 a khel tha tluang tak, quarter-final thlenga set hloh nei lo. Semi-final-ah he hmuna vawi 10 zet champion tawh Novak Djokovic sawp thei Jannik Sinners an ngaihven a hlawh a, champion thar ni tura rinkai a ni. Final-a a khingpui Daniil Medvedev nen hian an intum hmasak vawi kuaah vawi ruk ngawt tlawm zawk a nih vang leh Russia star Medvedev hi set hnih hloh hmasa chunga Alexander Zverev lehthal thei leh he hmuna final vawi hnih ngawt lo khel tawh a nih vangin Sinner tan a awlai dawn lo tih a chiang a. Medevdev hian champion turin rin a hlawh viau bawk. Tu zawk zawk pawh champion se a awlsam dawn lo tih erawh rin lawk deuh thup a ni.
Final ngaihven hlawh tak tan a ni a, tawnhriat ngah zawk Medvedev-a’n bul a tan tha hle. Medvedev-a service na tak chu Jannik Sinner-a’n a la fuh hlei thei meuh lo va, Italian hian unforce error a ngah viau bawk. Bul tan tha Medvedev hian set khatna leh set hnihnaah break vawi khat ve ve a nei a, game thum ve ve hloh chungin set a la zawn.
Awlsam taka set hnih a lak zawn vang leh a khingpuiin a khelh that loh vangin World No. 3 Medvedev hi awlsam takina champion mai a rinawm hman a, Sinner tantute tan a beidawnthlak hman hle. Mah se, inkhel a la tawp miau lo va, thil mak hmuh tur a la awm.
Zam tak chunga bul tan Jannik Sinner tan a tha zawngin thil a thleng a, set thumna atangin a insiamtha. Inkhel hmuhnawm takah Sinner hian tihsual a nei duh ta mang lova, point hmuh zawkah a tang ta fo. 5-4 a hmahruai laiin Italian 4th seed Sinner hian break pawimawh zet mai a nei a, set la lova tlawm pumpelhin, set thumna a la ve ta.
Set khat a lak vangin Sinner hian inrintawkna sang zawk a nei thar a, a zik ngui a parh thar a, a phur zui ta viau bawk. Inkhel boruak sanga takah a tlangnel telh telh a, thahrui ngah zawk a nihna a lantir thei ta bawk. Set linaah 5-4 a hma a hruai laiin break pawi-mawh zet mai a nei nawn leh a, set ala nawn leh a, 2-2 a ni ta.
Set hnih ve ve an lak hnuin Tennis ngainatute hawi lam a inthlak a, champion tura rinkai zawk chu Sinner a ni let ta daih. Deciding set tir lamah Sinner hian break theihna hun remchang a nei naa a chhawr tangkai thei lo. A hun tha hloh bawk mah se break a zui ta thuai tho a, champion a hnaih leh zual sauh. Break nei zawn thei lo mah se a serve a hum zui a, set hnih a hnufual zawh chungin Jannik Sinner hian 3-6, 3-6, 6-4, 6-4, 6-3 in hnehna a chang let a. Australian Open-ah ropui takin a champion.
Australian Open champion thar Jannik Sinner hi tunhnaia khel tha tluang ber ang hial a chhal ngam a ni a. Tennis player ropui ber Novak Djokovic chu tunhnaiah a hneh zawn nghe nghe. A chet that tluan em vang leh semi-final-ah Djokovic a hneh bawk vangin champion thar ni tura ngaih a ni a. A vawi khat nan Grand Slam-ah a champion zui ta a ni.
Champion thar ni a Sinner a nuih ver ver laiin Danill Medvedev erawh uiawm takin a chak zo lo nawn leh a, a mittui a tla nawn leh thung. US Open 2019 final-ah Rafael Nadal nen intumin Medvedev hian set hnih a la hmasa a. Champion ngei tura ngaih a nih laiin mak tak maiin Nadal-a’n a lehthal a, uiawm takin a champion zo lo. Nadal nen vek hian kum 2022 khan Austrlian Open final-ah an inhmachhawn zui leh a, set hnih a lak zawn hnuah champion turin dinhmun tha takah a ding tawh a, Nadal a sawp ngei tura ngaih a ni hman. Hemi tum pawh hian mak tak maiin Nadal hian a lehthal leh tlat pek a, teuh deuh chungin a champion zo lo leh. Kum 2019 leh 2022 a thil thleng a thlen nawn tir leh a, Sinner laka a hmahruaina hum zo lovin tlawm zawkah a tang zui leh a, teuh deuh bawkin a tham ral zui leh. Uiawm taka vawi thum ngawt a champion zo lo hi ui vangin a la hui pap pap ngei ang.
Kum 27 mi Daniil Medvedev hi Roger Federer, Rafael Nadal leh Novak Djokovic te pathum tiam lovin Grand Slam final lut thei pawl tak a ni a. Grand Slam final vawi nga a khelh tawhah vawi khat chiah a la champion.
Jannik Sinner
Australian Open champion thar Jannik Sinner hi 16 August 2001-ah a piang a, kum 2018 atangin professional Tennis a khel tan. World No. 4 a ni mek a, hei hi ranking-a a tawnsan ber a ni rih. Grand Slam final vawikhat a khelhnaah a champion nghal a. Davis Cup 2023-ah Italy a champion pui bawk.