Lenny Kravitz-a’n PCA Music Icon Award dawng dawn

Lenny Kravitz chu 2024 People’s Choice Awards-ah Music Icon Award hlan a ni dawn tih an puang a, Kravitz hi a perform nghal dawn a, a hla hrang hrang a sa nualin a rinawm. Music Icon Award hi 2021 khan Christina Aguilera-i’n a dawngin, 2022-ah Shania Twain-i’n a dawng a, 2023-ah erawh dawngtu an awm lo.
Lenny Kravitz hian 1999-2002 chhung khan, kum li chhung a zawnin Grammy Awards-ah best male rock vocal performance a dawng a, heng award te hi a hla ‘Fly Away,’ ‘American Woman,’ ‘Again,’ leh ‘Dig In,’ hla avanga a dawn te an ni.
Tunhnaiah Netflix film ‘Rustin’ tana a hlaphuah ‘Road to Freedom’ avangin Golden Globe-ah best original song- Motion picture-ah nomination a nei a, Critics Choice Awards-ah best song balah Oscar-ah pawh best original song-ah nominate a ni bawk. Kravitz hi 2023 khan Hollywood Walk of Fame inductee niin, May 2024 hian a album thar ‘Blue Electric Light’ a tlangzarh dawn bawk a ni.
NBC Universal Entertainment hnuaia live events and specials-a executive vice president Jen Neal chuan, “Lenny musical gift hi tehkhin rual loh a ni. Kuminah a chawimawi nana Music Icon kan hlan thei tur hi kan nghakhlelin kan phur tawh hle a ni,” a ti.
2024 People’s Choice Awards hi February ni 18 a sem tur niin, Simu Liu-a’n a host dawn a, award hi Barker Hangar, Santa Monica, California-ah an sem dawn a ni.