Serie A table lerah Inter kirleh

Pathianni zanah sikhat faia mualneitu Fiorentina hnehin Inter Milan chuan Serie A table-a an hmahruaina an luahkir a, an aia match khata khel tam Juventus chu pahnihna bawkah chhuk thla lehin, Inter lakah point khat bawkin an hniam chhunzawm leh.
Internazionale goal neihchhun hi first half minute 14-na leka an captain Lautaro Martinez-a tihluh niin, Argentine striker hian Kristjan Asllani corner chhuih atangin goal pawimawh a thawh.
Fiorentina hian hun tawp hma minute 15 la awmah an siphurh sut turin hun remchang an hmu a, Inter keeper Yann Sommer leh M’Bala Nzola intauh hrin-chhuah penalty chu Nicolas Gonzalez chuan chhe fahranin a chhuih a, penalty chawitu Sommer bawk hian a dansak.
Sommer hian minute 33-naah Giacomo Bonaventura goal tur dansak bawkin, chawlhlawk dawnah Nzola shot kawh zet a dangchat bawk.
La Viola lam hian hun tawp dawnah an siphurh sutna hun remchang dang hmu lehin, Luca Ranieri chuan Rolando Man-dragora corner chhuih chu goal pawnah a tauhchhuak hlauh.
Pathianni zan inkhel dangah defending champion Napoli chu lazio khelmualah an chak zo lo a, mualneitu team nen goal awm loa inhnehtawkin, table-ah pakuana an la thawhsan zo lo tluang zel a, point li laiin Champions League khelh phakna hun an la pha lo bawk.