An kawtkaia chak zo lo PSG

Paris St-Germain chuan Pathianni zana an mikhual Brest lakah hnehna chang zo loin 2-2 draw hlawhchhuak mah se Ligue 1 table-a anmahni hnaih-bertu Nice lakah point rukin hma an la hruaifal.
PSG hian vawihnih ngawt hma hruai mah se mikhual team hian an siphurh an sut ve ve thei a; home team goal hmahruai hi minute 40 khelh tlin dawna Marco Asensio tihluh niin, second half tir lam minute 55-ah Mahdi Camara chuan Brest siphurh sutna goal a khaklut a; chawlhlawk hma lawkin France forward Randal Kolo Muani chuan Luis Enrique team hmahruai nawnna leh an chakna goal ni thei tura ngaih thawh ve leh bawk mah se hun tawp hma minute 10 la awmah Mathias Pereira Lage chuan mikhual tan a tauhlut ve leh a, thawkrim Brest-in Paris khelmualah phu takin point khat an hlawhchhuak.
Kylian Mbappe pawhin goal thun theihna hun remchang hmu mah se a hlawhtling zo lo a, game 19 a khelhnaah a league goal 20-na tur a sualchhuak zo lo a, PSG-in inelna hrang hranga a zawna match ruk chak an tumna an puitlin zo lo.
Hun pekbelh minute lina a kal mek laiin PSG forward Bradley Barcola chu yellow card vawihnih hmuh vangin hnawhchhuah a ni a, Brest-in a tam zawk an nihna an chhawr hman ta bik chuang lo.
Inrinni khan Nice chuan sikhat faiin Metz an hneh a, pahnihna an luah mek an sawhngheh rualin Pathianni zanah hmahruaitu PSG an chak zo lo a, an inkar pawtzim hretin, Eric Roy-a team Brest pawhin table-ah pathumna an luah chhunzawm ve bawk.