East Bengal an champion

Pathianni zan khan Kalinga Super Cup final khelh a ni a, inkhel hmuhnawm takah East Bengal chan 3-2 in Odhisa FC an hneh a, kum 12 zet hnua a vawi khat nan trophy lian an chawi. Kalinga Super Cup-ah hian Mizo player an langsar hle a, Isak Ralte leh Lathuammawia Ralte ten mimal chawimawina sang an dawng.
Kalinga Stadium, Bhubaneswar-ah India rama football club hlun leh hlawhtling East Bengal chuan champion tumin Odhisa FC an hmachhawn a, si an phurh hmasak zet hnuin hun pangngaiah 2-2 in an inhnehtawk a. Extratime-ah E. Bengal hian Cleiton Silva goal thun hmangin hnehna pawimawh tak an chang a, trophy lian an chawi ve ta nge nge.
Final hmuhnawm takah hian inelna thlengtu Odhisa FC in bul an tan tha a, goal thun hmasa zawkah an tang. Minute 38-naah Diego Mauricio chuan hmahruaina goal a thun a, Si khat faia hmahruai chungin chawlhlawk an hmang.
Chawlhlawk hnu lamah East Bengal in goal thun ngei tumin tan an khawh a, goal pawh an thun ta thuai. Minute 51-naah Nandha chuan Kolkata club lian tan goal a thun a, an si phurh a sut. An si phurh an sut hnuin East Bengal an khel tha chhunzawm a, minute 62-naah Saul Crespo chuan hma an hruai letna goal a thun. Crespo goal thun hmang hian hun rei tak hma an hruai a, an chakpui zui teuh hle nghe nghe. An mualah an tlawm mai dawn emaw tih hnuah Odhisa hian minute 97-naah penalty an hmu. He penalty hi Ahmed Jahouh chuan a pet goal a, hun pangngaiah tlawm an pumpelh.
Hun pangngaiah 2-2 in an inhnehtawk a, player pakhat ve ve hnawhchhuah niin 10 ve ve an ni bawk. Hun pangngaiah chak zawk an awm theih loh vangin extratime khelh chhunzawm a ni. Goal thun tuma an innawr tawn zak zak hnuin minute 110-naah Cleiton Silva chuan goal pawimawh tak a thun a. He goal hmang hian East Bengal in hnehna pawimawh tak an chang a. Kum 12 zet hnuah trophy lian an hlawhchhuak ve ta nawlh.
Kalinga Super Cup khelh zawh takah Mizo hming a langsar hle. Odhisa FC si nghak Lalthuammawia Ralte chu si nghak tha berah thlan a ni a. Odhisa FC player pawimawh Isak Ralte chu ‘Kalinga Player of the Tournament’ thlan a ni bawk. Mimal chawimawina Mizo player te an hui bakah hian East Bengal defender Hijazi Maher chu defender tha berah thlan a ni a. Odhisa FC midfielder Ahmed Jahouh chu midfielder tha berah thlan niin, East Bengal champion na goal thuntu Cleiton Silva chu goal thun hnem ber a ni bawk.
Kalinga Super Cup champion East Bengal hi AFC Champions League 2 khel turin an tling nghal.