Thansanga kutah national award

January ni 29, 2024 khan Indian Dojang Sports Organisa-tion (IDSO) chuan India rama taekwondo instructor tha leh promoter tha thlanchhuah mi 17 hnenah national award a hlan a, an zingah hian Mizoram Amateur Taekwondo Association (MA-TA) general secretary leh SYS coach ni bawk Master Joseph Thansanga a tel.
Award hlanna inkhawm hi Talkatora Indoor Stadium, New Delhi-ah huaihawt niin, Arjuna awardee, world boxing champion leh athletic champion-te’n he hun hi an hmanpui a; award hlanna inkhawma hi IDSO chairman Pawan Saikia chuan kaihruaiin, Arjuna awardee Satish Kumar-a’n national award hi a hlan.
Mizoram taekwondo promote that vanga national award 2024 dawngtu Joseph-a chuan award a dawn chhan sawiin, “Hei hi MA-TA-a ka thawhpuite leh instructor zawng zawngte thawhrah vek a ni a, kei chu a hming tumtu mai ka ni. Kan instructor zawng zawngte tan ka hlan e,” a ti.
Joseph Thansanga hi New Delhi-a IDSO National Open Taekwondo Championship khelh mekah competition di-rector tura sawm a nih angin a hmanpui zui nghal a ni.
Taekwondo Federation of India (TFI)-in kum 2024 chhung atan TFI Technical Commmittee member a ruat tharah Master Joseph Thansanga hi Technical Committee (Poomsae) member panga zinga pakhat atan a ruat nghal bawk.
Technical Committee hian national referee seminar te, resouces person tur leh champoinship-a referee turte an thlangin an ruat dawn a ni.
He committee member ni tur hian International Poomsae Referee leh 5th Dan Black belt chin nih a ngai a, Joseph-a hian kum 2019 khan international referee chhuak tawhin, Mizo zinga international referee kan neih hmasa pathum zingah a tel a, midangte chu VL Sawma leh V. Lalniengate an ni.