Restricted tender sawiseltuten tender chhuah loin hna an sem – Zodintluanga

Restricted tender hmanga hna pek sawiseltute chuan tender chhuah loin hna tam tak an sem tih minister hlui Zodintluanga chuan a sawi.
“Restricted tender hmanga hna pek hahipa sawiseltute chuan tunhnai maiah tender pawh chhuah loin hna tam tak an sem a, ZPM kalphung thar hi mipuiin a nihna tak an hmu thuai dawn,” a ti.
Saitual, Khawzawl leh Champhai tlangdunga Congress party hruaitute nen an inkawmnaah Zodintluanga chuan Mizoramah party pathum kalphung a awm tak avangin mipuiin duhthlan tur an ngah tawh a, an thikthu a chhe hle tawh tih a sawi a. ZPM chu an sawrkar tirh phat atangin a key an la sang a, an intiam nasat em avangin mipui thikthu a chhe hle dawn a. Thutiam hlen theih loh tur tam tak an neih avangin kum 5 bak an sawrkar dawn lo, tiin a sawi.
Kum 5 chhunga eng chhit man tihsan loh, kawlphetha pe chhuak thei tura luipui panga khuah tum thu ZPM-in an sawi chu Mizoram mipuiin an hrereng tih sawiin, Mizorama chief minister kan neih tawh zinga adviser ngah ber chief minister chu ZPM chief minister a ni tih a sawi bawk.
Kum 5 hnuah chuan Mizoram mipuiin Congress-ah bawk rinna an nghat leh dawn a, chumi tur chuan Congress party mi leh a hminga hruaituten ngaihtuahna thar leh fim zawk an hman a, khawvel changkang leh ngaihtuahna thar zawk lo chhuak mila ram hmasawnna an kalpui theih dan ngaihtuah a ngai tih a sawi a ni.