Tun sawrkarah chuan a hun taka hna zawh tum tur – CM

Tun sawrkarah chuan hnathawhte a hun taka zawh ngei tum turin chief minister Lalduhoma chuan sawrkar official-te a chah.

Pradhan Mantri Gram Sodak Yojana (PMGSY) hnathawh thlirletin Zirtawpni khan chief minister kaihhruaiin an thukhawm a. PWD minister Vanlalhlana, adviser to CM TBC Lalvenchhunga leh PWD hotute an tel.
Sawrkar thar neih hmaa PMGSY hmalakna vawiin thlenga la thawh, a huna zawh hman loh tur nia lang chu chak taka thawhtir turin chief minister hian a chah a. “Sawrkar thar kan neih hnua hnathawhte phei chu a hun taka zawh ngei kan tum tur a ni,” a ti.
PMGSY Version 1 hmangin kawngpui 345, kilometres 4288-a thui sial a ni a, an zinga 43 hi la zawh loh a ni. Version 2 hmangin kawngpui 6, kilometre 194-a thui pavement leh repairing thawh a ni a, panga la zawh loh a ni. Tunah hian version 3 a lo chhuak leh tawh a, hmun 17-a upgradation leh improvement thawhna tur a ni.