Power plant tam zawk siam tumin kan bei mek – P&E minister

Power-a intodelh tumin hydel project mai ni lo, power siam theihna dangah hma an la a, power plant tam zawk siam an tum tih Power & Electricity minister F Rodingliana chuan a sawi.
Thawhtannia ZPM office-a inkhawmah an party consultant ni bawk F Rodingliana chuan, power-a intodelh theih nan hydel project bakah ni zung chakna hman tangkai lehzual an tum a. Rooftop leh solar plant lian siam tumin hma an la mek tih a sawi. “Hemi atan hian power khawlna tur – power store bank siam tum a ni a, nizung chakna bakah hydrogen leh ethanol hmanga power plant siam tura kawng dap a ni. Mizoram khaw hrang hrangin solar plant kan siamna tur ram min pe a, duhkhawp a la nih loh avangin kan intodelh theihnan hetiang hmun pe thei khua kan awm chuan a lawmawm hle ang,” a ti.
Power-a Mizoram a intodelh theih nan sawrkar laipui mai an dawr loa, foreign thlengin an dawr a, policy mila budget an siam atangin hmasawnna bung thar kai an tum a, kum 5 chhungin power-a intodelh an tum dawn tih a sawi.
“Kum 5 chhungin power-ah intodelh kan tum dawn a, company leh ram hrang hrang dawrin thil kalphung tha zawk kan zir zel a, chutianga hma kan lak mek laiin thenkhat chuan kum 10 chhunga an tih theih loh thla hnih khat chhunga ti mai turin min beiseina tawngkam ni awm takte kan hre thin. Hma kan la zel a, ZPM sawrkar eng ang chiah nge tih Zoram mipuiin an la hre dawn a ni,” a ti.
Thlasik khaw vawt avangin tunlai hian harsatna an tawk deuh a, mamawhna a san chhoh zel avangin transformer leh power line-ten zawh loh chang an nei thin tih P&E minister hian a sawi. Power supply kan hmuhna pakhat, Luangmual Sub Station incoming line-ah megawatt 70 aia tam pek theih a nih loh avangin load shedding a ngaih chang a awm thin a, tunah hian capacity sang zawk hmang thei turin hma an la a, peihfel hunah chuan he transformer-in a chawm veng 40 chuang harsatna tawh thin chu sutkian theih an beisei tih a sawi. AMC huamchhungah transformer thar 34, line thar leh bare conductor (hrui dum) kilometre tam tak ruahman a ni tih a sawi bawk.