Ruling party mi nih vanga duhsak kan remti lo – CM

Silk pangang khawi lama chhungkaw 700 tana hmalakna turah ruling party mi nih vanga duhsak bik neih an remti loa, a hlawhtling ngei tur thlan tum zawk turin chief minister Lalduhoma’n a chah.
Mizorama sericulture hmalakna thar project pathum – Lai Autonomous District Council huamchhunga chhungkaw 100 thlanchhuah tana cheng nuai 624. 47 senna tur Eri Project, Chakma ADC-a chhungkaw 100 thlanchhuahte tana cheng nuai 588.36 senna Mulberry Project kalpui tur, Mizoram pum huapa chhungkaw 500 thlanchhuah tana cheng nuai 1339.61 senga kalpui tur Muga Project chu Thawhlehni khan chief minister hian a hawng.
Khawvel pumah Muga Silkworm hi India ramah chauh a vulh theih a, India ramah pawh hmarchhakah chauh a kalpui theih tih chief minister hian a sawi a. Assam-in a thar tha thin a, nipui laia a lum tawh lutuk avangin tlangram an rawn melh tan a. Mizoram hi a tha em em tih finfiah a ni tawh tih a sawi.
Project pathum hawn hi farmer 700 huam tur hmalakna a ni tih sawiin, “A dawng tur thlan kawngah fimkhur a ngai a, ruling party mi an nih avang duhsak bik neih a rem kan ti lo. Tunhma in chutiang tih chu kan lo ching tawh thin a, hmalaknaten a hlawhchham phah nasa thin. Sawrkar tharah chuan mipui sawrkar kan nih ang ngeiin, tute emaw duhsak nana hmang loin, hlawhtling ngei turte thlan kan tum tur a ni,” Lalduhoma hian a ti.
Tunah hian khaw 200 chuangah chhungkaw 4000 aia tamin pangang an vulh mek a, an tharchhuah hralhna rate hi sawrkar chuan tihsan a tum a ni tih a sawi bawk.
Mizoram Sericulture department buatsaih leh hmalaknain Central Silk Board hotute leh India hmarchhak state hrang hranga Sericulture department telna Joint Coordination Committee (JCC) thutkhawm chu Thenzawl Golf Course-a Convention Centre-ah Thawhlehni khan neih a ni a. Central Silk Board member secretary P Shiva Kumar, IFS chuan a kaihruai a ni.