Khelh loh vanga inthiamlo Messi

Nimin lama tarlan tawh angin, Asia khawmualpui hruta season thar inbuatsaihna kalpui mek Major League Soccer team lar rawn ni chho ta thut Inter Miami captain Lionel Messi khelmual luh loh vangin Hong Kong mipui an lungawi lo a, an ticket lei tawh pawh thlenglet an dil hial a; nizanah American team hian Tokyo lamah friendly match dang khel lehin, tah hian Messi a inlan ta em tih hriat hman ni lo mah se he match khelh dawna chanchinbumite a kawmna hi thlir teh ang.
Thawhlehni khan Messi chuan a fit tawk loh avanga Hong Kong Stadium-a League XI a hmachhawn ve theih loh chungchangah pawi a tih thu sawichhuakin, he khawpuia inkhelh leh theihna hun rem-chang a la awm ngei thuin Chinese fans a thlamuan!
Hong Kong Stadium-ah khan a Barcelona team-mate hlui Luis Suarez-te nen substitute bench lamah an thu tluanchhuak a, stadium chhung khat vek khawpa ticket lei inkhel entute ngaihdan a ni lo ngang mai a, ticket thlenglet an dil a, Hong Kong sawrkar meuh pawh inrawlhin, organiser-te chu ticket man tihhniam thlenga an kal a ngaih mai theih thu an sawi.
Hong Kong mipui thinur khan MLS club Inter Miami an vaihma vek tawh a, club neitu pakhat zawk David Beckham pawh zuah loin a thusawi lai an ‘boo’ khum hial a; khami hnua a vawikhatna Thawhlehni khan Argentine chuan media hma-chhawnin, a inkhel thei lo pawi a tih thu leh a kaihza tihrawl na avanga khelmual lut thei a nih loh thu Tokyo hotel-a press conference a hmachhawn tumin heti hian a sawi:
“Hong Kong-ah khan open-door training session kalpui a ni a, a chhan pawh kan training lai hmuh tum mipui an fuankhawm tam vang niin, naupangte nena intawhna hun buatsaih a ni bawk a, kha vangte khan mipui hmuh theih tura training va chhim ve ngei kha ka duh a, mahse, a ruk tak chuan ka nuam lo a, tunah pawh a la pangngai chiah lo a, Hong Kong-ah kha chuan inkhelh a harsa tlat a ni.
“Mipuite beisei pawh ka hria a, Hong Kong-a inkhelhna hun remchang dang a la herchhuah leh ngei ka beisei,” a ti.
Kum 2022 World Cup-a Argentina tana trophy hlawh-chhuaktu Inter Miami captain Messi hian nizan friendly match-ah J-League champion Vissel Kobe a hmachhawn thei ta chiah em tih tarlan hman a ni lo a; Thawhlehnia media a hma-chhawn tumin Nilaini friendly match chungchang sawiin, “Naktuka ka dinhmun tur pawh hi ka la hre thei lo. Vawiin trai-ning lama boruak inher dana zirte pawh a ni ang chu. Tun thleng hi chuan ka inkhel thei dawn em a la chiang lo a, ni tlemte kalta ai kha chuan ka nuam ta deuh a, inkhelh theih hram chu ka duh khawp mai,” a ti.
Tokyo hotel-a press confe-rence-ah Messi team-mate pathum – Sergio Busquets, Jordi Alba leh Suarez bakah coach Tata Martino leh Beckham-te pawh inlan tura tih an nih laiin last minute-ah an thulh thut a, Messi hi amahin press mite an hmachhawntir ta a ni.
Hong Kong ang lo takin nimin Tokyo match atana ticket hi inkhelh hma ni Thawhlehni thleng khan lei tur a la awm a, nikum December thla nawi lam atang daih tawha zawrhchhuah ni mah se Hong Kong ang hum hum chuan hralh a tla ve ta chiah lo a ni.